„Fá betri þjónustu fyrir sama pening“

Dóms­mála­ráðu­neytið hefur hrundið af stað umfangs­miklu úttekt­ar­verk­efni sem ætlað er að fara yfir starf­semi þeirra stofn­ana sem heyra undir ráðu­neytið. Verk­efnið snýr meðal ann­ars að grein­ingu á fjár­málum, verk­ferlum, skipu­lagi, upp­lýs­inga­miðlun, sam­skiptum og eft­ir­liti ráðu­neyt­is­ins með stofn­un­unum.

Þetta kemur fram í til­kynn­ingu frá stjórn­völdum þar sem segir að Þorbjörg S. Gunn­laugs­dóttir dóms­mála­ráð­herra hafi kynnt minn­is­blað um verk­efnið á fundi rík­is­stjórn­ar­innar fyrir helgi.

Samkvæmt til­kynn­ing­unni eru fyrstu úttekt­irnar þegar hafnar hjá Útlend­inga­stofnun og Fang­els­is­mála­stofnun. Alls heyra 39 fag­stofn­anir undir dóms­mála­ráðu­neytið.

Markmið verk­efn­is­ins er að efla yfir­sýn yfir starf­semi stofn­an­anna og styrkja stjórn­sýslu, rekstur og eft­ir­lit innan mála­flokks­ins.

„Eitt af for­gangs­verk­efnum rík­is­stjórn­ar­innar er að hag­ræða og ein­falda stjórn­sýsl­una. Það getur líka þýtt að fá betri þjón­ustu fyrir sama pen­ing. Við viljum fá betri yfir­sýn til þess að styðja áfram vel við okkar stofn­anir í þeirra vanda­sömu verk­efnum. Þetta eru góð skref til þess og jákvætt fyrir alla,“ segir Þorbjörg S. Gunn­laugs­dóttir dóms­mála­ráð­herra.“