Þrjátíu og sjö ára breskur maður lést eftir harkaleg slagsmál á hinu vinsæla næturlífssvæði Las Veronicas í Playa de las Américas á suðurhluta Tenerife í nótt.
Samkvæmt fréttum Televisión Canaria áttu tveir breskir ríkisborgarar hlut að máli, hinn látni og 23 ára gamall maður sem hefur verið handtekinn grunaður um árásina.
Öryggisverðir yfirbuguðu manninn
Fram kemur að einkennisklæddir öryggisverðir frá skemmtistöðunum á svæðinu hafi gripið inn í eftir slagsmálin og náð að halda meintum árásarmanni þar til lögregla mætti á staðinn um klukkan eitt um nóttina.
Viðbragðsaðilar reyndu að endurlífga manninn með hjartahnoði en hann var úrskurðaður látinn á vettvangi þrátt fyrir tilraunir þeirra.
Yfirvöld skipuðu jafnframt tímabundna lokun allra skemmtistaða á svæðinu meðan lögregla og neyðarlið störfuðu á vettvangi.
Rannsókn hafin
Lögreglan hefur hafið rannsókn á málinu til að skýra nákvæmlega hvað gerðist.
Enn hefur ekki verið staðfest opinberlega hvernig slagsmálin hófust né hver nákvæm dánarorsök mannsins var.
Atvikið hefur aftur vakið athygli á öryggismálum á Veronicas-svæðinu sem er þekkt fyrir bari, skemmtistaði og næturlíf.
Reynt að bæta ímynd svæðisins
Undanfarna mánuði hafa eigendur skemmtistaða á svæðinu sameinast um að ráða sérstakt öryggisfyrirtæki til að vakta Veronicas-svæðið í því skyni að bæta ímynd þess og auka öryggi fyrir þúsundir ferðamanna sem sækja staðinn heim ár hvert.
Í samstarfi við bæjarlögreglu hafa þeir meðal annars reynt að stöðva götusölu á gaskútum og blöðrum, reka vasaþjófa burt og sporna gegn fíkniefnasölu.
Eigendur staðanna segja þó að átök og ofbeldisatvik milli ferðamanna geri starf þeirra við að bæta orðspor svæðisins mun erfiðara.
Athugasemdir