Dómsmálaráðherra, Þorbjörg S. Gunnlaugsdóttir, hefur skipað þriggja manna starfshóp sem ætlað er að fara yfir gildandi lög og skilyrði fyrir veitingu íslensks ríkisborgararéttar. Markmiðið með vinnunni er að greina þróun umsókna, framkvæmd málsmeðferðar og hvort ástæða sé til breytinga á lagaumhverfi eða verklagi.
Í tilkynningu frá stjórnvöldum segir ráðherra mikilvægt að tryggja að veiting ríkisborgararéttar sé bæði vönduð og í takt við samfélagsþróun. „Að fá ríkisborgararétt eru forréttindi. Að fá íslenskan ríkisborgararétt er, og á að vera, stór stund í lífi þeirrar manneskju sem hann fær,“ segir Þorbjörg.
Starfshópinn skipa Ásta Sóllilja Sigurbjörnsdóttir, Vigdís Ósk Häsler Sveinsdóttir og Vilhjálmur Hilmarsson, sem jafnframt gegnir formennsku. Tveir starfsmenn ráðuneytisins munu einnig aðstoða hópinn við störf hans.
Ástæða endurskoðunarinnar er meðal annars mikil fjölgun umsókna um íslenskan ríkisborgararétt á síðustu árum. Umsóknum til Útlendingastofnunar hefur fjölgað um 290 prósent á síðustu fimm árum og einnig hefur umsóknum til Alþingis fjölgað verulega.
Hópurinn mun bera íslensk skilyrði saman við reglur á hinum Norðurlöndunum og meta hvort þörf sé á breytingum. Þá á hann að leggja fram tillögur að úrbótum á stjórnsýslu og lagaumhverfi. Gert er ráð fyrir að starfshópurinn skili ráðherra niðurstöðum sínum eigi síðar en 1. október.
Athugasemdir