Lögreglan á Kanarí hefur handtekið starfsmann hótels í ferðamannabænum Mogán sem grunaður er um að hafa stolið skartgripum að verðmæti þúsunda evra úr herbergjum gesta.
Málið kom upp þegar ferðamaður tilkynnti um þjófnað á nokkrum gullgripum, þar á meðal hringum og hálsmenum, úr hótelherbergi sínu. Verðmæti gripanna var metið á um 15 þúsund evrur, jafnvirði rúmlega tveggja milljóna íslenskra króna.
Rannsókn spænsku lögreglunnar leiddi í ljós að engin merki voru um innbrot í herbergið eða öryggishólfið. Grunur vaknaði því um að rafrænn aðgangslykill hefði verið notaður til að komast inn í herbergið.
Við skoðun á gögnum úr rafrænu kerfi hótelsins kom í ljós að starfsmannalykill, sem hafði verið skráður týndur nokkrum mánuðum áður, hafði verið notaður á þeim tíma sem talið er að þjófnaðurinn hafi átt sér stað.
Lögregla bar saman upplýsingar úr kerfinu við ferðir starfsfólks innan hótelsins. Niðurstöðurnar sýndu að grunaði starfsmaðurinn hafði farið inn í nærliggjandi herbergi aðeins einni mínútu eftir að týndi lykillinn var notaður til að opna herbergi brotaþolans.
Í kjölfarið var starfsmaðurinn yfirheyrður og eigur hennar rannsakaðar á vinnustaðnum. Að sögn lögreglu sýndi hún merki um taugaveiklun og reyndi að fela veski sitt meðal vinnufatnaðar.
Við leitina fannst að sögn lögreglu hinn týndi rafræni lykill í veski hennar, falinn meðal persónulegra skjala.
Rannsóknin hefur jafnframt tengt konuna við þrjú önnur sambærileg mál á sama hóteli þar sem gestir tilkynntu um þjófnað á peningum og skartgripum úr herbergjum sínum.
Konan, sem samkvæmt lögreglu hefur áður komið við sögu vegna þjófnaðar- og innbrotamála, hefur verið leidd fyrir dómara. Rannsókn málsins stendur enn yfir.
Athugasemdir