Unnur Þorsteinsdóttir, íbúi á Akureyri, gagnrýnir Bíladaga harðlega í færslu sem hún birti á Facebook og segir hávaða frá hluta þátttakenda valda íbúum verulegum óþægindum.
Í færslunni lýsir hún því hvernig hávær umferð breyttra og aflmikilla ökutækja hafi áhrif á daglegt líf íbúa, sérstaklega þeirra sem búi við Þingvallastræti og í nærliggjandi hverfum. „Bíladagar á Akureyri er fyrirbæri sem þarfnast sálfræðilegrar skoðunar. Í bæinn ryðjast illa heilaskemmdar manneskjur af öllum kynjum, akandi á gríðarlega hávaðasömum farartækjum af ýmsum gerðum í þeim tilgangi einum, virðist vera, að skapa hávaða og ergelsi hjá bæjarbúum,“ skrifar Unnur meðal í færslunni.
Unnur segir að ástandið hafi batnað nokkuð eftir að aðalsvæði hátíðarinnar var flutt upp fyrir bæinn, en telur þó að götur bæjarins séu enn mikið notaðar af ökumönnum sem vilji sýna getu bíla sinna. Hún gagnrýnir það sem hún telur skort á tillitssemi gagnvart íbúum, þar á meðal börnum og eldra fólki sem geti átt erfitt með að búa við slíkan hávaða.
Þá bendir hún á að lögregla hafi takmarkað bolmagn til að fylgjast með umferðinni og framfylgja reglum. Hún nefnir jafnframt að ólöglegt sé að aka ökutækjum sem ekki uppfylli lögbundnar kröfur um hljóðbúnað.
Þrátt fyrir gagnrýni sína tekur Unnur fram að fjölmargir gestir Bíladaga séu til fyrirmyndar og að það sé aðeins hávær minnihluti sem varpi skugga á viðburðinn.
Að lokum skorar hún á nýja bæjarstjórn Akureyrar að skoða mögulegar leiðir til að draga úr ónæði fyrir íbúa í framtíðinni. Meðal annars nefnir hún að loka mætti ákveðnum íbúagötum fyrir umferð eða setja upp aðrar takmarkanir á meðan hátíðin stendur yfir.
Mikið að gera
Mikill erill var hjá lögreglunni á Norðurlandi eystra samhliða Bíladögum á Akureyri. Nokkrar líkamsárásir voru tilkynntar og voru nokkrir handteknir vegna þeirra. Í einni árás missti brotaþoli meðvitund og í annarri hlaut hann nefbrot. Einnig hafa verið tilkynnt umferðaróhöpp og fleiri afskipti vegna aukins gestafjölda.
Athugasemdir