Karlmaður hefur verið dæmdur í sex mánaða óskilorðsbundið fangelsi fyrir að aka tvívegis undir áhrifum áfengis og sviptur ökurétti, en Héraðsdómur Reykjavíkur kvað upp dóm í málinu. Dómurinn áréttar jafnframt ævilanga sviptingu ökuréttar mannsins.
Annað brotið átti sér stað í febrúar 2025 þegar maðurinn var stöðvaður á Selfossi eftir að hafa ekið sviptur ökurétti. Mældist vínandamagn í blóði hans 1,34 prómill. Hann játaði þá háttsemi fyrir dómi.
Hitt brotið var framið í ágúst sama ár þegar tilkynningar bárust lögreglu um stórhættulegt aksturslag bifreiðar á Vesturlandsvegi í átt að Reykjavík. Lögreglumaður sem var á frívakt fylgdi bifreiðinni eftir og lýsti því að henni væri ekið um allan veg. Þegar bifreiðin nam staðar við Olís í Norðlingaholti var maðurinn handtekinn. Blóðrannsókn sýndi síðar að vínandamagn í blóði hans var 2,27 prómill.
Maðurinn neitaði sök vegna síðara brotsins og hélt því fram að fyrrverandi kærasta hefði ekið bifreiðinni eftir að hafa sagt við skýrslutöku að vinur sinn hefði ekið. Fyrir dómi sagðist eiginkona hans hafa ekið bílnum. Dómurinn taldi þá skýringu ekki trúverðuga. Vísað var meðal annars til framburðar lögreglumanns sem fylgdi bifreiðinni, vitnisburðar annarra lögreglumanna og upptöku úr öryggismyndavél sem þótti styðja að maðurinn hefði sjálfur verið undir stýri.
Við ákvörðun refsingar leit dómurinn til þess að maðurinn hafði áður ítrekað gerst sekur um sambærileg umferðarlagabrot. Fram kemur að þetta sé í fimmta sinn sem hann er sakfelldur fyrir akstur undir áhrifum áfengis og/eða fíkniefna eftir að hafa náð 18 ára aldri og í þriðja sinn fyrir akstur sviptur ökurétti. Því voru ekki talin efni til að skilorðsbinda refsinguna. Auk fangelsisvistar var honum gert að greiða rúmlega 850 þúsund krónur í sakarkostnað og málsvarnarlaun.
Athugasemdir