Áfram Ísland hefur boðað til upphafsfundar í Sjálfstæðissalnum við Austurvöll mánudaginn 6. júlí klukkan 17.00 þar sem nýr vettvangur þeirra sem vilja að Ísland standi utan aðildar að Evrópusambandinu verður formlega kynnt.
Samkvæmt tilkynningu frá samtökunum er Áfram Ísland ætlað að vera opinn vettvangur fyrir fólk sem styður sjálfstæða framtíð Íslands og hyggst taka þátt í umræðunni fyrir þjóðaratkvæðagreiðsluna sem fram fer 29. ágúst.
Fram kemur að hreyfingin sameini fólk með fjölbreyttan bakgrunn úr íslensku samfélagi en sameiginleg sýn þátttakenda sé að Ísland eigi best með að gæta hagsmuna sinna utan Evrópusambandsins. Þá segir jafnframt að stór hluti þjóðarinnar telji Ísland áfram vera land tækifæranna og að þjóðin sé vel í stakk búin til að takast á við þær áskoranir sem fram undan eru.
Af því tilefni hefur einnig verið opnuð heimasíða Áfram Ísland þar sem áhugasömum gefst kostur á að skrá sig til þátttöku.
Á fundinum munu Björn Zoëga, Lára Herborg Ólafsdóttir og Ólafur Ragnar Grímsson flytja erindi. Fundarstjóri verður Halldór Benjamín Þorbergsson.
Fundinum verður streymt á netinu og hvetja skipuleggjendur fólk um allt land til að fylgjast með, hvort sem er á heimilum sínum eða með sameiginlegum samkomum í byggðarlögum. Fundurinn verður opinn öllum sem vilja kynna sér starfsemi Áfram Íslands og taka þátt í umræðunni.
Athugasemdir