Nýtt myndefni úr óútgefinni heimildamynd um bandaríska öldungadeildarþingmanninn Lindsey Graham heitinn sýnir hann lýsa herferð sinni fyrir stríði gegn Íran sem „því besta sem ég hef nokkurn tímann gert“ og líkja Donald Trump Bandaríkjaforseta og Benjamin Netanyahu, forsætisráðherra Ísraels, við Franklin D. Roosevelt og Winston Churchill.
Breski kvikmyndagerðarmaðurinn Alex Holder fékk óvenju víðtækan aðgang að Graham á síðustu árum ævi hans og tók upp yfir 400 klukkustundir af efni. Þar sést Graham ræða við Trump, Netanyahu og jafnvel Jake Sullivan, fyrrverandi þjóðaröryggisráðgjafa demókrata, um stríðið við Íran og önnur öryggismál.
„Þetta er það besta sem ég hef nokkurn tímann gert. Hann elskar að sprengja hluti,“ segir Graham í einni upptökunni um tilraunir sínar til að fá Trump til að styðja hernaðaraðgerðir Ísraels.
Í annarri upptöku hrósar hann Trump fyrir framgöngu sína á stríðstímum.
„Hann hefur varla skrifað neitt á samfélagsmiðla. Engin dramatík. Hann hefur verið frábær stríðsforseti. Ég sagði í gærkvöldi að Trump og Bibi væru eins og Roosevelt og Churchill.“
Spár rættust ekki
Í myndinni má einnig heyra Graham spá því í símtali við Jake Sullivan í mars að innan þriggja til fjögurra vikna myndu írönsk stjórnvöld byrja að missa tökin á stórborgum landsins og að arabísk ríki myndu fljótlega taka virkari þátt í átökunum.
Þær spár hafa hins vegar ekki ræst.
Holder segir að heimildamyndin veiti einstaka innsýn í einn áhrifamesta stjórnmálamann Bandaríkjanna og náin tengsl hans við Trump. Hann segir jafnframt að fleiri upptökur sem sýna samband þeirra verði birtar síðar.
Elton John söng afmælissöng
Myndefnið inniheldur einnig léttari augnablik, meðal annars þegar tónlistarmaðurinn Elton John hringir í Graham og syngur fyrir hann afmælissöng þegar hann varð sjötugur.
Holder hyggst gefa út heimildamyndina, sem ber heitið Lindsey's Game, á næstu mánuðum. Að hans sögn samþykkti Graham þátttöku í verkefninu til að skilja eftir heimildir um störf sín og hvetja aðra til að starfa í opinberri þjónustu.
Lindsey Graham lést fyrr í þessum mánuði, 71 árs að aldri. Minningarathafnir um hann verða haldnar í Washington og heimaríki hans, Suður-Karólínu, síðar í vikunni.
Athugasemdir