Yfirvöld í Grikklandi hafa borið kennsl á konu sem fannst látin í ferðatösku í yfirgefnu húsi í Kypseli-hverfinu í miðborg Aþenu 18. júlí. Um er að ræða 38 ára breska konu.
Samkvæmt lögreglu fæddist konan í Skotlandi í febrúar 1988. Talið er að hún hafi komið til Grikklands 29. júní eftir flug frá Bandaríkjunum með millilendingu á Kýpur. Rannsakendur kanna nú hvort hún hafi verið við störf í landinu. Nafn hennar hefur ekki verið gert opinbert.
Ekki tókst í fyrstu að bera kennsl á konuna með gagnagrunnum grískra yfirvalda. Því voru fingraför hennar send í gegnum Interpol til lögregluyfirvalda í öðrum löndum. Samstarf grískra og bandarískra yfirvalda leiddi að lokum til þess að hægt var að staðfesta hver hún var.
Breska sendiráðinu í Grikklandi hefur verið gert viðvart, sem og föður konunnar. Lögregla hyggst ræða við hann til að afla upplýsinga um ferðir hennar og samskipti síðustu vikurnar fyrir andlátið.
Rannsókn beinist nú að því að rekja ferðir konunnar eftir komuna til Grikklands, meðal annars hvar hún dvaldi, hvort hún hafi ferðast með öðrum og hvern hún hitti áður en hún lést.
Lögregla hefur enn ekki fengið skýra mynd af tengslum hennar í Grikklandi. Verið er að fara yfir upptökur úr öryggismyndavélum, taka skýrslur af vitnum og rannsaka önnur gögn í von um að varpa ljósi á aðdraganda dauða hennar.
Rannsókn málsins stendur enn yfir.
Athugasemdir