Tveir bandarískir ríkisborgarar hafa verið dæmdir í fimm mánaða fangelsi hvor fyrir að hafa staðið saman að innflutningi á tæplega ellefu kílóum af maríhúana til Íslands. Dómur féll í Héraðsdómi Reykjaness á mánudag.
Mennirnir, Joshua Andrew Transou, fæddur árið 1998, og Elvin Gabriel De La Rosa, fæddur árið 1999, voru ákærðir fyrir stórfellt fíkniefnalagabrot. Samkvæmt ákæru stóðu þeir að innflutningi á samtals 10.945 grömmum af maríhúana sem ætlað var til söludreifingar hér á landi í ágóðaskyni.
Fram kemur í dómnum að mennirnir hafi verið í samskiptum við óþekktan aðila í Bandaríkjunum um framkvæmd innflutningsins. Joshua flutti fíkniefnin til landsins sem farþegi í flugi frá Denver til Keflavíkurflugvallar 19. júlí síðastliðinn. Efnin voru falin í farangurstösku. Elvin fylgdi honum í fluginu og upplýsti óþekktan aðila um framgang ferðarinnar.
Báðir játuðu brot sitt skýlaust við þingfestingu málsins og samþykktu upptöku fíkniefnanna. Hvorugur hafði áður gerst sekur um refsiverða háttsemi samkvæmt gögnum málsins.
Dómurinn taldi ekki sýnt fram á að mennirnir hefðu átt fíkniefnin eða tekið þátt í skipulagningu innflutningsins umfram það að samþykkja að flytja efnin gegn greiðslu. Hins vegar væri umtalsvert magn fíkniefna að ræða og þáttur þeirra ómissandi liður í innflutningnum.
Hvor um sig var dæmdur í fimm mánaða óskilorðsbundið fangelsi.
Athugasemdir