Gunnur Helgadóttir hefur verið ráðin forstjóri Hrafnistu. Hún hefur gengt starfinu tímabundið frá lokum júlí en hún starfaði fyrir það sem framkvæmdastjóri heilbrigðissviðs Hrafnistu.
Gunnur hefur starfað hjá Hrafnistu frá árinu 2020. Þar áður var hún framkvæmdastjóri lyfjafyrirtækisins Vistor í nærri tíu ár. Hún er með MBA-gráðu frá Háskólanum í Reykjavík og BS-próf í hjúkrunarfræði frá Háskóla Íslands. Gunnur hefur auk þess víðtæka stjórnunarreynslu og starfsreynslu sem hjúkrunarfræðingur.
„Ég tek við starfinu af mikilli tilhlökkun og metnaði. Hrafnista býr yfir mikilli þekkingu og öflugu starfsfólki. Ég hlakka til að vinna áfram með þessum góða hópi að því að þróa þjónustuna og skapa íbúum okkar öryggi, traust og vellíðan,“ er haft eftir Gunni í tilkynningu.
Hrafnista er stærsti rekstraraðili hjúkrunarheimila á Íslandi og rekur sex hjúkrunarheimili á höfuðborgarsvæðinu og eitt á Reykjanesi. Meginmarkmið Hrafnistu er að veita framúrskarandi þjónustu þannig að íbúar, aðrir þjónustuþegar og aðstandendur upplifi öryggi, traust og vellíðan. Hrafnista er óhagnaðardrifið dótturfélag Sjómannadagsráðs og saga starfseminnar nær aftur til ársins 1957 þegar Hrafnista í Laugarási tók til starfa.
Athugasemdir