Lögregla í suðurhluta Kína hefur handtekið 35 ára gamlan mann eftir hnífaárás fyrir utan veitingastað í borginni Guangzhou í gær. Nokkrir særðust í árásinni en enginn þeirra er talinn í lífshættu.
Lögreglu bárust tilkynningar um árásina klukkan 17.20 að staðartíma. Hún átti sér stað í Panyu-hverfi borgarinnar, að því er fram kemur í yfirlýsingu lögreglu. Hinn grunaði, sem aðeins hefur verið nafngreindur með eftirnafninu Li, var handtekinn í kjölfarið.
Ekki hefur verið upplýst hversu margir særðust né hvað talið er hafa vakað fyrir árásarmanninum. Myndskeið sem birt hafa verið á samfélagsmiðlum benda til þess að árásin hafi átt sér stað í verslunarmiðstöð. Þar sjást að minnsta kosti þrír einstaklingar með áverka í andliti.
Á einu myndskeiði úr öryggismyndavél virðist grímuklæddur maður stinga konu í andlitið þegar hann gengur fram hjá henni fyrir utan veitingastað. Önnur myndskeið sýna lögreglumenn þjóta inn í verslunarmiðstöðina á meðan fólk flýr af vettvangi.
Nokkrar alvarlegar hnífaárásir hafa átt sér stað í Kína undanfarin ár. Í maí særðust þrír, þar á meðal tveir japanskir ríkisborgarar, í árás á veitingastað í Sjanghæ. Í nóvember 2024 létust átta og 17 særðust í hnífaárás fyrrverandi nemanda við verknámsskóla í austurhluta landsins.
Athugasemdir