Táragasi var beitt gegn mótmælendum í Madríd á miðvikudagskvöld þegar óeirðalögregla framfylgdi útburði á 87 ára gamalli konu, Maríu del Carmen Abascal, úr íbúð sinni. Atvikið hefur vakið gífurlega reiði á meðal Spánverja og sett umræður um vaxandi húsnæðiskreppu Spánar á fullt skrið.
Hundruð manna og meðlimir húsnæðisréttindahópa söfnuðust saman við íbúðina í Retiro-hverfinu til að reyna að koma í veg fyrir útburðinn. Lögregla mætti á svæðið beitti táragasi og dró mótmælendur á brott til að rýma innganginn. Hin 87 ára gamla María, sem hafði búið í íbúðinni í yfir sjö áratugi, var að lokum borin út á sjúkrabörum vegna örmögnunar og flutt á sjúkrahús.
Leigan fimmfaldaðist
Rætur málsins liggja í sölu íbúðarinnar til fjárfestingafélagsins Urbagestión árið 2020. Félagið hækkaði í kjölfarið mánaðarlega leigu úr 500 evrum í 2.650 evra. Það er upphæð sem María átti enga möguleika á að greiða af 1.350 evru mánaðarlegum lífeyri sínum.
Þrátt fyrir að lögmaður hennar og aðgerðasinnar hafi reynt að semja og óskilgreindur velgjörðarmaður hafi jafnvel boðist til að greiða hina háu leigu hafnaði leigusalinn öllum tilboðum. Hæstiréttur Spánar úrskurðaði að lokum eigendunum í hag á þeim grundvelli að gamli leigusamningurinn væri runninn út.
Pólitískur titringur á hæsta stigi
Atvikið hefur skekið spænsk stjórnmál og kallað á hörð viðbrögð frá ráðamönnum. Pedro Sánchez, forsætisráðherra Spánar, stóð frammi fyrir spurningum um málið á allsherjarþingi Sameinuðu þjóðanna í New York og kallaði atburðinn „félagslegan harmleik“. Húsnæðismálaráðherra landsins, Teresa Rodríguez, tók í sama streng og fordæmdi spákaupmennsku á húsnæðismarkaði.
Stjórnmálaflokkar á vinstri vængnum, þar á meðal samstarfsflokkurinn Sumar, krefjast þess nú að sett verði bráðabirgðastöðvun á útburði í landinu. Á sama tíma saka íhaldssamir stjórnmálamenn vinstri menn um að nota harmleikinn í pólitísku áróðursskyni.
Mótmælin á miðvikudagskvöld beindust einnig gegn héraðsstjóra Madrídar, Isabel Díaz Ayuso, en hún hefur áður verið gagnrýnd vegna umdeildra kaupa á lúxusíbúð og þykir tákngervingur þess ójafnaðar sem ríkir á spænskum fasteignamarkaði um þessar mundir.
Athugasemdir