Tæplega hundrað manns söfnuðust saman fyrir framan Alþingishúsið á Austurvelli í dag til að lýsa óánægju sinni með ríkisstjórn Kristrúnar Frostadóttur. Mætingin varð töluvert minni en viðbrögð við boðuðum mótmælum á Facebook höfðu gefið til kynna.
Alexandra Mist Halldórsdóttir stóð að viðburðinum, sem bar yfirskriftina Fellum þessa ríkisstjórn. Samkvæmt kynningu á mótmælunum var markmiðið að koma óánægju með stjórnvöld á framfæri, meðal annars vegna hækkandi kostnaðar.
Engin ein tiltekin aðgerð ríkisstjórnarinnar var nefnd sem kveikjan að mótmælunum. Þess í stað var fólk hvatt til að fjölmenna á Austurvöll, mótmæla hækkunum og krefjast þess að ríkisstjórnin færi frá. Þátttakendur voru jafnframt hvattir til að taka með sér skilti, trommur, lúðra og annað sem gæti vakið athygli á málstaðnum.
Viðburðurinn hafði fengið töluverð viðbrögð á Facebook áður en mótmælin hófust. Um 5.500 manns höfðu brugðist við honum með einhverjum hætti. Þegar til kastanna kom mættu hins vegar tæplega hundrað manns á Austurvöll.
Sigfús Aðalsteinsson, stofnandi Ísland þvert á flokka, var meðal þeirra sem tóku til máls á samkomunni. Mótmælin fengu jafnframt óvenjulegan blæ þegar Sigfús stýrði afmælissöng fyrir Alexöndru Mist, sem fagnaði afmæli sínu í dag.
Karl Gauti Hjaltason, þingmaður Miðflokksins, sást einnig á Austurvelli og dvaldi þar um stund meðan á mótmælunum stóð. Virðist hann vera eini þingmaðurinn sem mætti á mótmælin.
Athugasemdir