Lögbýlið Dægra 1 í Rangárþingi eystra hefur verið sett á sölu en ásett verð er 75 milljónir króna. Eignin stendur á 34,7 hektara landi og henni fylgir fjölbreyttur húsakostur, þar á meðal tvö gestahús, hesthús, gróðurhús, reykkofi og þurrkhjallur.
Samkvæmt fasteignaauglýsingu er íbúðarhúsið á jörðinni 30,5 fermetrar og var byggt árið 2017. Húsið er á hæð og risi en undir því er einnig steyptur kjallari sem ekki er skráður hjá Þjóðskrá.
Í húsinu eru forstofa, eldhús og stofa í opnu rými, baðherbergi, svefnherbergi og ris. Varmadæla er í kjallaranum. Fram kemur í lýsingu að gólfefni séu komin til ára sinna og að almennt sé komið að viðhaldi á húsakosti jarðarinnar.
Tvö 15 fermetra gestahús, bæði byggð árið 2017, standa einnig á landinu. Hvort þeirra samanstendur af opnu rými og baðherbergi og við húsin eru litlir sólpallar.
Þá er þar 70,4 fermetra geymsla frá árinu 2017. Byggt hefur verið við hana en viðbyggingin er ekki skráð hjá Þjóðskrá. Hesthús á jörðinni er jafnframt skráð sem geymsla en þar eru fjórar stíur fyrir skepnur auk sambyggðrar vélageymslu.
Það sem helst vekur athygli er fjöldi óskráðra bygginga á jörðinni. Þar má meðal annars finna geymslu með innkeyrsluhurð, geymsluskúr, hestaskýli, gróðurhús og kartöflugeymslu.
En upptalningin endar ekki þar. Á landinu eru einnig reykkofi, þurrkhjallur og tyrfð geymsla sem ekki eru skráð hjá Þjóðskrá.
Dægra 1 er samtals 34,7 hektarar að stærð og er eignin auglýst til sölu fyrir 75 milljónir króna.
Athugasemdir