Flugvél Ameliu Earhart mögulega fundin

Eftir tæp­lega 90 ár gæti ráð­gátan um hvarf flug­kon­unnar Ameliu Earhart loks verið að leys­ast. Hópur vís­inda­manna og rann­sak­enda frá Archaeological Legacy Institute og Purdue-háskóla kom til óbyggðu eyj­ar­innar Niku­mar­oro í Suður-Kyrra­hafi 12. októ­ber til að leita að flug­vél hennar. Gervi­hnatta­myndir hafa sýnt óvenju­lega lögun á kafi í lóni við eyj­una.

Fyr­ir­bærið, sem hefur fengið heitið Taraia-hlut­ur­inn, er talið kunna að vera Lockheed Model 10-E Electra-flug­vélin sem Earhart flaug ásamt leið­sögu­mann­inum Fred Noonan þegar þau hurfu árið 1937.

Það mun þó taka rann­sak­endur nokkurn tíma að kom­ast að því hvort kenn­ingin reyn­ist rétt. Samkvæmt frétta­til­kynn­ingu frá Purdue-háskóla munu þeir þurfa nokkra daga til að ryðja sér leið í gegnum frum­skóg­inn frá lend­ing­ar­stað sínum að Taraia-skaga, þar sem lónið er.

Auk þess þurfa leið­ang­urs­menn að sofa um borð í skipi. Kókoskrabbar, sem eru stærstu land­krabba­dýr heims, eru svo stórir og fyr­ir­ferð­ar­miklir að það þykir óhent­ugt að dvelja á eyj­unni yfir nótt.

Þegar leið­ang­ur­inn nær til Taraia-skaga hyggj­ast rann­sak­endur nota seg­ul­mæli til að leita að járn­kenndum málmum sem gætu bent til þess að þar séu leifar flug­vél­ar­innar eða aðrir gripir. Einnig verður són­ar­bún­aður not­aður til að greina hluti á botni lóns­ins.