Maður látinn eftir smit af veiru sem leggst á búfé

Fyrsta til­felli Shamonda-veiru í mönnum hefur greinst í Frakk­landi, þar sem sjúk­lingur með veru­lega skert ónæm­is­kerfi lést eftir að hafa smit­ast í byrjun októ­ber.

Shamonda-veiran herjar einkum á naut­gripi og önnur hús­dýr og berst með litlum bit­mýum. Fram að þessu var ekki talið að veiran gæti smitað menn.

Talið er að mað­ur­inn hafi smit­ast í aust­ur­hluta Frakk­lands, þar sem veiran hafði verið í umferð meðal dýra vorið og sum­arið 2026.

Franska land­bún­að­ar­ráðu­neytið segir mann­inn hafa fengið með­ferð við alvar­legum veik­indum á sjúkra­hús­inu Hospices Civils de Lyon, en hann lést í byrjun októ­ber. Rann­sóknir á klínískum ein­kennum, líf­fræði­legum þáttum og far­alds­fræði máls­ins standa enn yfir.

Að sögn ráðu­neyt­is­ins voru fylgi­kvillar í heila sjúk­lings­ins fyrir and­látið mjög lík­lega tengdir sýk­ing­unni. Yfirvöld segja þó ekk­ert benda til þess að veiran ógni heilsu almenn­ings miðað við þá þekk­ingu sem nú liggur fyrir.

Veiran hefur greinst í dýrum víða um heim

Shamonda-veiran greind­ist fyrst í Nígeríu á sjö­unda ára­tug síð­ustu aldar en hefur síðan fund­ist í dýrum víðar um heim, meðal ann­ars í Afríku og Japan. Nokkur Evr­ópu­lönd hafa einnig til­kynnt um smit á þessu ári.

Samkvæmt bresku stofn­un­inni Animal and Plant Health Agency (APHA) geta naut­gripir sem smit­ast fengið skyndi­legan hita, nið­ur­gang og kvið­verki. Stofn­unin greindi einnig frá því í síð­asta mán­uði að veiran hefði fund­ist í kúm á Ermar­sunds­eyj­unni Jersey.

Sýkingin getur haft sér­stak­lega alvar­legar afleið­ingar fyrir dýr sem ganga með kálf. Hún hefur verið tengd við fóst­ur­lát og fæð­ing­argalla hjá kálfum. Veiran hefur einnig greinst í öðru búfén­aði, þar á meðal sauðfé, geitum, hestum og alpakka­dýrum.

Rann­sókn­ar­stofa á sviði dýra­lækn­is­fræði­legrar grein­ingar, Laboklin, hefur til­kynnt um til­felli í Frakk­landi, Sviss og Aust­ur­ríki eftir að veiran greind­ist fyrst í Þýska­landi í ágúst.

Veiran berst með skor­dýrum, til­heyrir Simbu-hópi veira og er erfða­fræði­lega skyld Schmallenberg-veirunni.

Samkvæmt bresku land­bún­að­ar­sam­tök­unum Agriculture Bureau er ekki talið að Shamonda-veiran sé ban­væn naut­gripum. Ekkert bólu­efni er nú til sem verndar dýr gegn henni.