Um 20 þúsund manns komu saman á ólöglegri teknóhátíð á hernaðarsvæði nærri bænum Bourges í miðhluta Frakklands um helgina, þrátt fyrir viðvaranir yfirvalda um hættu vegna ósprunginna sprengja á svæðinu.

Samkvæmið hófst á föstudag og búast skipuleggjendur við að allt að 30 þúsund gestir frá Frakklandi og nágrannaríkjum muni mæta þegar mest verður um að vera síðar um helgina.

Í yfirlýsingu frá héraðsyfirvöldum segir að stjórnvöld hafi gripið til ráðstafana til að tryggja öryggi þátttakenda og draga úr raski fyrir íbúa í nágrenninu, þrátt fyrir að viðburðurinn sé ólöglegur.

Philippe Le Moing Surzur, æðsti embættismaður svæðisins, sagði í samtali við AFP-fréttastofuna að svæðið væri „afar hættulegt“ vegna mögulegra ósprunginna sprengja sem þar kynnu að leynast. Hann sagði svæðið hafa verið nýtt í hernaðarlegum tilgangi í um 150 ár og að sprengjusérfræðingar fyndu þar reglulega gamlar fallbyssukúlur og önnur sprengiefni.

Þá hvatti hann gesti sérstaklega til að halda sig frá skóglendi í nágrenni hátíðarsvæðisins.

Margir þátttakendur segja samkomuna vera bæði tækifæri til skemmtunar og mótmæli gegn hertum lögum og aðgerðum yfirvalda gagnvart ólöglegum teknóviðburðum í Frakklandi.

„Ég hafði heyrt að margir myndu mæta, en það er samt áfall að sjá svona mikinn mannfjölda á einum stað,“ sagði 22 ára gamall gestur við AFP undir nafnleynd.

Annar þátttakandi, 19 ára, sagði mikla þátttöku senda „sterk skilaboð gegn kúgun“.

Um 600 lögreglumenn og 45 slökkviliðsmenn hafa verið sendir á svæðið til að sinna öryggisgæslu og viðbragðsþjónustu.

Edith Raquin, bæjarstjóri í þorpinu Cornusse sem er skammt frá hátíðarsvæðinu, sagði í samtali við fjölmiðla að íbúar væru að undirbúa sig undir annasama nótt.

„Við gætum þurft að vaka alla nóttina,“ sagði hún.

Engin alvarleg atvik höfðu verið tilkynnt þegar síðast fréttist, en sjúkra- og neyðarþjónusta hafði sinnt um tug einstaklinga vegna minniháttar meiðsla.