Ritstjórinn fyrrverandi Reynir Traustason opnar sig um líkamsárás sem hann varð fyrir meðan hann starfaði á DV á sínum tíma í viðtali í hlaðvarpsþættinum Eyjan en Reynir ræddi ýmis umdeild mál sem komu upp í samfélaginu á þeim tíma meðan hann var ritstjóri og blaðamaður.

Í viðtalinu lýsir Reynir því þegar Jón Trausti Lúthersson mætti á skrifstofu DV árið 2004 og tók hann kverkataki. Reynir kærði Jón Trausta til lögreglu fyrir árásina og segir ritstjórinn frá því að hann hafi frétt að fé hafi verið sett honum til höfuðs í framhaldinu.

Reynir átti í framhaldi þess samtal við yfirlögregluþjón sem sagði honum að lögreglan gæti ekkert gert en gaf í skyn að Reynir ætti að fá einhvern til berja Jón Trausta. Ritstjórinn setti í samband við mann í undirheiminum sem hann þekkti og bað hann um að skoða þetta mál fyrir sig. Korteri síðar fékk hann símtal um að Jón Trausti yrði ekki aftur með vesen.

„Ég heyrði aldrei meira frá Jóni Trausta og félögum og hann endaði jú með því að fara á Litla-Hraun í tvo mánuði ef ég man rétt. Og síðasta tilraunin þeirra var sú að þeir sátu fyrir mér í Héraðsdómi þegar ég var að koma að bera vitni. Ég hugsaði með mér, hvernig getur þetta gerst í þessu réttarríki að annar sparkaði í mig fyrir, bara fyrir framan konurnar sem eru þarna í búrinu? Þeir ætluðu að hrekja mig í burtu þannig að ég færi ekki að vitna. En auðvitað fór ég og Sveinn Andri varði Jón Trausta. Símon grimmi var dómari þannig að þetta var allt í lagi. Hann sendi gaurinn á Hraunið. Oft eru þessir, þetta eru stór börn. Eins og aumingja Jón Trausti Lútherssonar. Hann var í jakkafötum þarna með bindi og svona fallegur í framan. Maður hugsaði með sér: Það er eiginlega ljótt af manni að senda svona fallegan mann í fangelsi. Svona fallegt barn. Og ég hef aldrei óttast þessa menn.“

Jón Trausti var dæmdur í tveggja mánaða fangelsi í héraðsdómi Reykjavíkur.

Það var þó ekki eina sem Reynir ræddi í þættinum en hann talaði líka um bókina Fólkið í vitanum sem hann var að gefa út. Hún er samfelld saga vitavarða og fjölskyldna þeirra í Hornbjargsvita í 65 ár og byggir á fjölda viðtala, bréfaskriftum og rituðum útgefnum heimildum um líf og starf í vitanum og nágrenni hans.

Fyrirvari um hagsmuni: Reynir Traustason er einn af liðlega tuttugu eigendum Sameinaða útgáfufélagsins ehf. sem á Mannlíf