Ísrael hefur vísað úr landi tveimur erlendum aðgerðasinnum sem voru handteknir eftir að ísraelski sjóherinn stöðvaði hjálparflota á leið til Gaza-strandarinnar á alþjóðlegu hafsvæði, að því er utanríkisráðuneyti Ísraels greinir frá.
Aðgerðasinnarnir, Saif Abu Keshek og Thiago Avila, voru meðal fjölda fólks sem sigldi með flotanum þegar ísraelski sjóherinn stöðvaði skipið undan ströndum grísku eyjarinnar Krít þann 30. apríl.
Mennirnir voru handteknir af ísraelskum hermönnum og fluttir til Ísraels til yfirheyrslu á meðan öðrum þátttakendum flotans var sleppt á Krít.
Ísraelska utanríkisráðuneytið sagði í færslu á samfélagsmiðlinum X að Abu Keshek og Avila hefðu verið sendir úr landi í dag að lokinni rannsókn.
Í myndskeiði sem birt var á samfélagsmiðlum sagðist Abu Keshek vera kominn til Aþenu og þakkaði lögfræðingum sínum og stuðningsfólki fyrir hjálpina. Þá sagði hann að sú meðferð sem þeir Thiago urðu fyrir í fangelsi Ísraela, kæmist það ekki í hálfkvisti við þá meðferð sem þúsundir palestínskir fangar þurfa að þola, þar á meðal fjölmörg börn sem þar eru í fangelsi. Ítrekaði hann einnig að verkefninu sé hvergi nærri lokið og að enn væru bátar á leið til Gaza með hjálpargögn.
Ísraelsk stjórnvöld sögðu Abu Keshek grunaðan um tengsl við „hryðjuverkasamtök“ og Avila grunaðan um ólöglega starfsemi. Báðir vísuðu ásökununum á bug og sögðust hafa verið í mannúðarleiðangri fyrir óbreytta borgara á Gaza. Þeir sögðu handtöku sína á alþjóðlegu hafsvæði ólögmæta.
Spánn, Brasilía og Sameinuðu þjóðirnar kölluðu öll eftir tafarlausri lausn mannanna.
Á miðvikudag hafnaði ísraelskur dómstóll kæru sem mótmælti gæsluvarðhaldi þeirra og mannréttindasamtökin sem gættu hagsmuna þeirra kölluðu niðurstöðuna „ólögmæta“.
Global Sumud-flotinn lagði af stað frá Frakklandi, Spáni og Ítalíu með það markmið að rjúfa hafnbann Ísraels á Gaza og flytja mannúðaraðstoð til svæðisins.
Fyrri ferð flotans á síðasta ári var einnig stöðvuð af ísraelskum hersveitum undan ströndum Egyptalands og Gaza.
Ísrael hefur haft stjórn á öllum aðkomuleiðum til Gaza síðan árið 2007 og mannúðarsamtök hafa ítrekað varað við alvarlegum skorti á nauðsynjum á svæðinu frá því að Ísraelar hófu árásir á svæðið í október 2023.
