Bók Ævars Þórs Benediktssonar, Skólastjórinn, hefur náð þeim árangri að vera mest selda bók landsins í nóvember, rétt eins og í október. Þetta kemur fram í nýjum bóksölulista Félags íslenskra bókaútgefenda.
„Við munum ekki eftir að þessi staða hafi komið upp áður og þetta sýnir allavega gríðarlegar vinsældir Ævars,“ segir Sigþrúður Gunnarsdóttir, framkvæmdastjóri Forlagsins. „Hann er líka búinn að fara um allt land til að lesa úr bókinni og er um leið ötull talsmaður barnabóka og lesturs.“
Skólastjórinn er myndskreytt af Elínu Elísabet Einarsdóttur. Hún fjallar um 12 ára vandræðagemling sem sækir um stöðu skólastjóra í gríni. Svo fer að hann ræður ríkjum í skólanum með bestu vinkonu sinni.
Arnaldur annar
Á hæla Skólastjóra Ævars fylgir spennusagnahöfundurinn Arnaldur Indriðason, með bókina Tál, sem á því ekki að venjast að vera neins eftirbátur í jólabókaflóðinu.
Arnaldur var með söluhæstu bókina í fyrra eins og mörg önnur ár, Ferðalok. Í nóvember í fyrra tróndi hann sjálfur á toppnum. Það árið skákaði Arnaldur Yrsu Sigurðardóttur með bókina Ég læt sem ég sofi. Í nóvember í ár situr Yrsa hins vegar í 11. sæti sölulistans, nokkuð neðar en Franski spítalinn, eftir Katrínu Jakobsdóttur og Ragnar Jónsson, sem gefinn er út af Veröld.
Arnaldur var einnig með mest seldu bókina árið 2023, Sæluríkið, en árið 2022 vék hann af toppnum fyrir Katrínu Jakobsdóttur og Ragnari Jónassyni, sem gáfu þá út Reykjavík glæpasögu.
Arnaldur er gefinn út af Forlaginu, stærstu bókaútgáfu landsins, rétt eins og Skólastjóri Ævars Þórs, en Yrsa af Veröld.
Svo virtist sem Yrsa ætlaði að hafa betur í upphafi jólabókaflóðsins, þar sem hún sat ofar en Arnaldur á bóksölulista Pennans. Arnaldur tróndi hins vegar á toppnum í sölu hjá Bónus í lok mánaðarins.
Nýr metsöluhöfundur
Ævar Þór Benediktsson, sem er fæddur árið 1984, er útskrifaður leikari frá Listaháskóla Íslands. Hann hefur síðan leikið bæði á sviði og í sjónvarpsþáttum en einnig framleitt sitt eigið efni fyrir útvarp og sjónvarp, meðal annars undir merkjum Ævars vísindamanns. Fyrsta bók Ævars var smásagnasafnið Stórkostlegt líf herra Rósar og fleiri sögur af ótrúlega venjulegu fólki, sem kom út árið 2010. Frá þeim tíma hefur hann einbeitt sér að barna- og unglingabókum og er einn vinsælasti og afkastamesti höfundur landsins á því sviði með á fjórða tug verka.
Ævar sigrar bókamarkaðinn
Útgefin verk Ævars Þórs Benediktssonar nálgast nú fjórða tuginn. Ævar hefur hlotið fjölda verðlauna og viðurkenninga fyrir bækur sínar og framlag sitt til barnamenningar. Fyrsta bókin í Þín eigin-bókaflokki hans, Þín eigin þjóðsaga, hlaut Bókaverðlaun barnanna og Bókmenntaverðlaun starfsfólks bókaverslana. Vélmennaárásin og Þitt eigið ævintýri voru báðar tilnefndar til Íslensku bókmenntaverðlaunanna og sú síðarnefnda einnig til Barnabókaverðlauna Reykjavíkurborgar. Risaeðlur í Reykjavík komst á blað bandarísku verðlaunanna DeBary Children’s Science Book Award sem sérhæfa sig í vísindabókum fyrir börn. Fyrir bandarísku útgáfuna af bókinni Strandaglópar! (Næstum því) alveg sönn saga voru Ævari veitt heiðursverðlaun hinna virtu Margaret Wise Brown-barnabókaverðlauna en bókin hefur auk þess hlotið fjölda annarra viðurkenninga þar í landi. Fyrir Skólastjórann hlaut hann Barnabókaverðlaun Guðrúnar Helgadóttur. Fimm ár í röð stóð Ævar fyrir vinsælu lestrarátaki meðal íslenskra barna en fyrir framtakið var hann tilnefndur til alþjóðlegu ALMA-verðlaunanna, minningaverðlauna um Astrid Lindgren. Bækur Ævars hafa komið út í Bandaríkjunum, Danmörku, Svíþjóð, Rússlandi og Eistlandi.
Upplýsingar frá Forlaginu
Komment