Tugþúsundir manna tóku þátt í mótmælum víða um Ítalíu í dag þar sem skólar voru lokaðir, lestarsamgöngur truflaðar og hafnir og vegir lokaðir. Um var að ræða eina umfangsmestu mótmæli í Evrópu gegn árásum Ísraels á Gaza.

Mótmælin fóru fram þegar Frakkland og nokkur önnur ríki undirbjuggu sig að viðurkenna ríki Palestínu á allsherjarþingi Sameinuðu þjóðanna í dag, í kjölfar þess að Bretland, Ástralía, Portúgal og Kanada gerðu slíkt í gær.

Ítalía hefur þó hingað til haldið sér frá þessu sameiginlega skrefi ríkjanna. Forsætisráðherrann Giorgia Meloni sagði í júlí við ítalska dagblaðið La Repubblica að það gæti verið gagnslaust að viðurkenna palestínskt ríki áður en því væri raunverulega komið á fót. „Ef eitthvað sem ekki er til er viðurkennt á pappír, gæti vandamálið virst leyst þegar það er það ekki,“ sagði hún.

Almennt verkfall í samstöðu við Gaza

Grasrótarstéttarfélög víða um Ítalíu stóðu að 24 klukkustunda verkfalli í samstöðu með íbúum Gaza. Þau sögðu ástæðuna meðal annars vera „aðgerðaleysi ítalskra og evrópskra stjórnvalda“ gagnvart mannúðarkreppunni þar.

Frá Mílanó til Palermo streymdu Ítalir út á götur í að minnsta kosti 75 sveitarfélögum. Í Genúa og Livorno lokuðu hafnarverkamenn höfnunum og sögðu ástæðuna vera áhyggjur af því að Ítalía væri notuð sem milliliður fyrir vopnasendingar til Ísraels.

Í Róm söfnuðust yfir 20.000 manns saman fyrir utan Termini-lestarstöðina, veifuðu palestínskum fánum og kölluðu slagorðið „frjáls Palestína“. „Ég er hér til að styðja fólk sem er verið að útrýma,“ sagði hinn 17 ára Michelangelo við fréttamenn AFP.

Stjórnmálafræðinemi á nágrannatorginu Piazza dei Cinquecento vísaði til nýlegrar niðurstöðu rannsóknarnefndar SÞ um að Ísrael stundi þjóðarmorð á Gaza. „Þetta þýðir ekki að við séum gyðingahatarar, og við erum orðin þreytt á því að fjölmiðlar og stjórnmálamenn spili á þá ranghugmynd,“ sagði hún í samtali við La Repubblica. „Við erum einfaldlega á móti ríkisstjórn sem fremur þjóðarmorð á meðan alþjóðasamfélagið horfir á.“

„Ítalía verður að stöðvast í dag“

Mótmælin gengu undir slagorðinu „Let’s Block Everything“, þar sem krafist var að ítölsk stjórnvöld stöðvuðu efnahags- og hernaðarlegt samstarf við Ísrael og studdu Global Sumud Flotilla, alþjóðlegt átaksverkefni með yfir 50 litlum bátum sem ætlað er að rjúfa hafnbann Ísraels og koma mannúðaraðstoð til Gaza.

Skipuleggjendur sögðu að 50.000 manns hefðu safnast saman í Mílanó og lögreglan í Bologna taldi fjöldann þar vera yfir 10.000.

Í Mílanó blossaði upp spenna þegar mótmælendur vopnaðir kylfum reyndu að brjóta sér leið inn á aðaljárnbrautarstöðina. Þeir köstuðu reyksprengjum, flöskum og steinum að lögreglu sem svaraði með piparúða. Í Bologna beitti lögreglan vatnsbyssum til að dreifa hópi sem hafði lokað aðalumferðargötu.

„Börn eru drepin og sjúkrahús sprengd á Gaza, Ítalía verður að stöðvast í dag,“ sagði mótmælandinn Federica Casino, 52 ára, við AFP. „Ítalía talar en gerir ekkert.“

Ríkisstjórnin heldur sig til hlés

Meloni hefur ítrekað lýst áhyggjum af aðgerðum Ísraels en hægrisinnuð ríkisstjórn hennar hefur tekið varfærna afstöðu til stríðsins á Gaza og leitast við að rækta náin tengsl við Donald Trump og bandamenn hans í Bandaríkjunum.

Samgönguráðherrann Matteo Salvini dró úr vægi mótmælanna á mánudag og sagði þau vera „pólitíska áróðursaðgerð vinstrisinnaðra stéttarfélaga“. Hann hrósaði jafnframt þeim sem mættu til vinnu.

Átökin í Gaza harðna

Ísraelski herinn hefur síðustu daga hert árásir sínar á Gaza. Samkvæmt nýjustu tölum hafa yfir 65.000 Palestínumenn verið drepnir á síðustu 23 mánuðum og óttast er að þúsundir til viðbótar séu grafnir í rústum. Fyrrverandi yfirmaður ísraelska hersins staðfesti nýlega að meira en 200.000 Palestínumenn hefðu annaðhvort verið drepnir eða særst í stríðinu.

Stríðið hófst í kjölfar árásar Hamas og bandamanna þeirra á Ísrael 7. október 2023 þar sem um 1.200 manns létust og um 250 voru teknir í gíslingu.