Söng- og nú leikarinn Auðunn Lúthersson fer með aðalhlutverk í stuttmyndinni Freyr, sem nú er aðgengileg á streymisveitunni Hulu.
„Stuttmyndin Freyr er núna aðgengileg á Hulu! Mikill heiður að leika aðalhlutverk í þessari fallegu sögu,“ segir Auðunn í tilkynningu.
Hann segist hafa fengið hlutverkið með skömmum fyrirvara.
„Ég landaði titilhlutverkinu einni viku fyrir tökur og vissi í sannleika sagt ekkert hvað ég var að koma mér út í. Handritið var óvenjuleg en hjartnæm saga um vináttu svo ég lét slag standa.“
Myndin var tekin upp í Oakland í Kaliforníu snemma á síðasta ári og hefur síðan verið sýnd á fjölmörgum kvikmyndahátíðum í Bandaríkjunum. Þar á meðal var hún sýnd á Tribeca Film Festival í New York og HollyShorts-kvikmyndahátíðinni í Los Angeles, áður en hún varð aðgengileg á Hulu.
Yfirframleiðandi myndarinnar er Emmy-verðlaunahafinn Lena Waithe, en leikstjóri er David Telles.
Að sögn Auðuns hefur verkefnið haft jákvæð áhrif á feril hans í Bandaríkjunum.
„Í kjölfarið fékk ég bæði manager og agent í kvikmyndabransanum hérna í Los Angeles og ég hlakka mikið til komandi verkefna!“
