Tónlistarmaðurinn Auður gaf út glænýja plötu á föstudaginn. Platan, sem heitir 336, fjallar um ferðalagið milli Kaliforníu og Íslands og vísa lagatitlar í kennileiti og staðsetningar beggja staða. Þar má nefna 101, óður til Reykjavíkur, 10.000 ft. sem gerist í háloftunum og 90015, póstnúmerið í miðborg Los Angeles, sem er lokalag plötunnar.

„Ég er fæddur í Bandaríkjunum en flyt til Íslands sex ára. Líf mitt hefur verið stöðugur samanburður á tveimur menningarheimum, stóru og flóknu landi annars vegar og litlu og einföldu landi hins vegar,” segir Auður.

Hann bætir við að hann hafi flutt til Kaliforníu fyrir nær þremur árum þar sem hann starfi nú sem lagasmiður. „Ég er alltaf í nýjum ævintýrum. Ég kom til Íslands í september til að halda tónleika í heimabænum mínum í Hafnarfirði og platan varð til í þessari heimsókn. Titillinn er vísun í þær 336 klukkustundir, eða tvær vikur, sem það tók að semja lögin.

Ég elska íslensku og það var frelsandi að semja lög á móðurmálinu í fyrsta sinn í dágóðan tíma. Ég elska Ísland og ég elska tónlist.”

Auður hefur á sama tíma verið að gera það gott í Los Angeles með verkefninu Luthersson og unnið með tónlistarfólki á borð við Rayana Jay, Social House, Chichi og Luca.

Samhliða verkefnunum í LA hefur hann einnig unnið að væntanlegri plötu Bubba Morthens, leikið í stuttmyndinni Freyr sem frumsýnd var á Tribeca Film Festival, fengið hlutverk í tekílaauglýsingu í Mexíkó og komið fram í tónlistarmyndböndum fyrir Doja Cat og Jack Harlowe.

„Ég reyni bara að segja já við öllu sem er spennandi og sleppi því að ofhugsa hlutina. Það var mikil breyting að flytja hingað og þekkja bara einhverja örfáa ketti. Það frábæra við LA er að hér er fullt af listafólki með stóra drauma og það er auðvelt að kynnast fólki.”

Platan er unnin með reyndum íslenskum hljóðupptökustjórum og nýjum röddum í íslenskri dægurtónlist. Þar má nefna Martein Hjartarson (Bngrboy), Emil Lorange, Pálma Ragnar og Daníel Friðrik.

Plötuumslagið er unnin með ljósmyndaranum Ara Michelson.

Hlusta má á plötuna hér.