Alþjóðlegir aðgerðarsinnar sem hafa verið vísað úr Ísrael eftir að Ísraelsher stöðvaði Frelsisflotann á leið til Gaza, hafa lýst frekari frásögnum af misþyrmingum og niðurlægingu í haldi.

Um 450 þátttakendur í svonefndum Global Sumud Flotilla-(Frelsisflotanum), voru handteknir á milli miðvikudags og föstudags þegar Ísraelsher stöðvaði skipin, sem voru að reyna að brjóta hafnbann Ísraels á Gaza og flytja þangað táknrænan hjálparfarm til Palestínumanna.

Við heimkomu til Rómar í gær sagði ítalski aðgerðarsinninn Cesare Tofani við fréttastofuna ANSA:

„Það var komið fram við okkur á hræðilegan hátt … bæði hjá hernum og hjá lögreglunni. Það var áreitni í gangi.“

Yassine Lafram, formaður Sambands íslamskra samfélaga á Ítalíu, sagði við Corriere della Sera:

„Þeir komu fram við okkur með ofbeldi, beindu byssum að okkur, og það er algjörlega óásættanlegt í landi sem telur sig lýðræðisríki.“

Blaðamaðurinn Saverio Tommasi sagði að ísraelskir hermenn hefðu neitað föngum um lyf og komið fram við þá „eins og apaketti“, samkvæmt frétt Associated Press.

„Þeir hæddu okkur til að niðurlægja, gera gys að og hlæja í aðstæðum þar sem ekkert er til að hlæja að,“ sagði hann.

Í hópnum voru meðal annarra Greta Thunberg, Mandla Mandela, barnabarn Nelsons Mandela, og nokkrir Evrópuþingmenn.

Annar ítalskur blaðamaður, Lorenzo D’Agostino, sagðist hafa orðið fyrir þjófnaði:

„Ísraelsmenn stálu bæði peningum mínum og eigum,“ sagði hann við AP og bætti við að hermenn hefðu notað hunda og beint leysergeisla byssa sinna að föngunum til að hræða þá.

Paolo De Montis, annar aðgerðarsinni, sagði að hann hefði upplifað „stöðuga streitu og niðurlægingu“ meðan hann var í fangabíl klukkustundum saman með hendurnar bundnar með plastböndum.

„Það var bannað að horfa í augun á þeim. Ef maður leit upp, var maður hristur og sleginn í hnakkann,“ sagði hann.

„Þeir neyddu okkur til að standa á hnjánum í fjórar klukkustundir.“

Tvær malasískar systur, söng- og leikstjörnurnar Heliza og Hazwani Helmi, lýstu einnig „grimmilegri“ og „hrottafenginni“ meðferð.

„Við drukkum vatn úr klósettinu. Sumir veiktust mjög alvarlega en þeir sögðu bara: „Eru þeir dauðir? Ef ekki, þá er það ekki mitt vandamál“,“ sagði Hazwani við fréttastofuna Anadolu.
„Þeir eru mjög, mjög grimmir.“

Heliza bætti við:

„Ég borðaði síðast 1. október. Þetta er fyrsta máltíðin minn í dag. Ég borðaði ekkert í þrjá daga, drakk aðeins vatn úr klósettinu.“

Fyrr höfðu aðgerðarsinnar greint frá því að Greta Thunberg hefði verið „dregin á hárinu eftir jörðinni“, „neydd til að kyssa ísraelska fánann“ og „notuð sem áróðurstæki“.

Ísrael neitar ásökunum

Ísraelska utanríkisráðuneytið kallaði frásagnirnar „hrikalegar lygar“, en öfgahægri-ráðherrann Itamar Ben-Gvir, þjóðaröryggisráðherra Ísraels, sagðist „stoltur“ af harðri meðferðinni:

„Ég er stoltur af því að við komum fram við ‘flotaaðgerðasinna’ eins og hryðjuverkamenn. Hver sem styður hryðjuverk er hryðjuverkamaður og á skilið sams konar meðferð,“ sagði hann.

„Ef einhver hélt að hann kæmi hingað til rauðs dregils og lúðrablásturs, þá hafði hann rangt fyrir sér.“

Utanríkisráðuneytið í Tel Aviv hélt þó öðru fram:

„Allur réttur hinna handteknu var virtur,“ sagði í færslu á X (áður Twitter).

„Greta sjálf og aðrir neituðu að flýta brottvísun sinni og kvörtuðu ekki um neitt af þessum fáránlegu ásökunum, vegna þess að þær gerðust einfaldlega ekki.“

Aðgerðir Ísraels hafa þó vakið hörð viðbrögð. Ríki á borð við Pakistan, Tyrkland og Kólumbíu hafa fordæmt handtökurnar, Grikkland hefur sent formlega mótmæli og víða um heim hafa brotist út mótmæli á götum úti.

Utanríkisráðuneyti Ísraels greindi frá því í gær að 29 aðgerðarsinnum hefði verið vísað úr landi, en margir væru enn í haldi.