Lögreglan var kölluð til í dag þegar tilkynnt var um „brjálaða, öskrandi konu fyrir utan grunnskóla í Reykjavík“. Að sögn lögreglu reyndist konan „einnig vera ber að ofan þegar lögregla kom á vettvang en lögregla þekkti hana vegna fyrri afskipta“. Samkvæmt skýrslu lögreglunnar var „sjúkrabifreið fengin fyrir konuna sem virtist í geðrofi“.
Tilkynnt um mann sem gekk berserksgang í verslunarkjarna. Maðurinn braut rúðu og skemmdi vörur og muni hjá nokkrum verslunum. Aðilinn var handtekinn á vettvangi, en hann óskaði sjálfur eftir aðstoð vegna þess að hann væri andlega veikur. Manninum var að lokum „komið í hendur heilbrigðiskerfisins“, að sögn lögreglu.
Að auki var tilkynnt um ógnandi mann á bráðamóttöku Landspítalans í Fossvogi. „Starfsmenn vildu fá hann út og fór svo að lögregla vísaði manninum út,“ segir lögreglan.
Þjófar vildu með strætó
Í dag var einnig tilkynnt um þrjá menn í strætisvagnaskýli með meint þýfi úr verslun sem var ennþá með þjófavörninni á. „Sterkur grunur um að mennirnir höfðu stolið muninum miðað við upptökur úr versluninni,“ segir í dagbók lögreglu. Framburðir voru teknir af mönnunum á vettvangi en þeir lausir að því loknu, að sögn lögreglu.
14 ára án hraðatakmarkana
Ökumaður vespu var stöðvaður í Kópavogi sem var með farþega. Ökumaðurinn reyndist vera 14 ára gamall og því ekki með aldur til þess að aka vespunni. Þá var ekki gert ráð fyrir farþega á vespunni auk þess að búið var að eiga við vespuna þannig að hægt var að aka henni hraðar en hún ætti að komast. Haft samband við foreldra drengjanna og vespan haldlögð.
