Leikkonan Amanda Seyfried segir að hún hafi oft orðið fyrir hrekkjum af hálfu Channing Tatum þegar þau léku saman í kvikmyndinni Dear John árið 2010.
Í viðtali við Deadline, sem birt var í gær, 15. janúar, rifjaði Seyfried upp atvik sem hún segir hafa gert tökurnar enn eftirminnilegri.
„Hann pissaði einu sinni á fótinn á mér án þess að ég vissi af því,“ sagði hún. „Hann pissaði á mig á ströndinni. Ég fattaði þetta ekki strax og hugsaði svo: „Ó, þess vegna stendur hann svona nálægt mér. Hvað í ósköpunum…“?“
Að sögn Seyfried fór hrekkurinn næstum því lengra en henni fannst ásættanlegt, og hún þurfti að koma í veg fyrir að annar starfsmaður yrði óvart fyrir honum.
„Það var kaffibolli alveg við hliðina, og smá sletta fór í bollann og hann hljóp í burtu,“ sagði leikkonan. „Ég var öskrandi og einn förðunarmeistarinn tók bollann upp og var að fara að drekka úr honum, og ég bjargaði henni.“
Þrátt fyrir þetta segir Seyfried að andrúmsloftið á tökustað hafi verið afar gott.
„Þetta sýnir bara sambandið sem ég átti við Channing Tatum í Dear John,“ sagði hún. „Við vorum stöðugt að stríða hvort öðru alla myndina, á mjög skemmtilegan hátt. Hann er rosalega fyndinn og við skemmtum okkur konunglega.“
Myndin, sem byggð er á skáldsögu Nicholas Sparks, fjallar um ástarsögu hermannsins Johns Tyree, sem Tatum leikur, og háskólanemans Savannah, sem Seyfried leikur. Þrátt fyrir að myndin hafi komið út fyrir meira en áratug segir Seyfried minningarnar enn lifa.
Hún gaf aðdáendum sínum einnig innsýn í vinskap þeirra árið 2021 þegar hún deildi svarthvítum myndum af þeim tveimur á tökustað þar sem þau grettu sig framan í myndavélina. Með myndunum skrifaði hún: „#tbt DEAR JOHN“.
Seyfried hefur áður rætt samband þeirra á tökustað í viðtali við E! News, þar sem hún kallaði Tatum þá „uppáhalds mótleikara sinn til þessa“.
„Channing og ég höfum mjög svipaða hegðun á tökustað,“ sagði hún í júní 2015. „Við tökum hlutina ekki of alvarlega, þó við séum að taka upp mjög þunga mynd um ást og rómantík. Hún er algjör vasaklútamynd, svo við höfum gaman af því að leika okkur aðeins.“
