Einar Þór Jónsson minnist vinar síns sem lést á 19. mars síðastliðinn.
Framkvæmdarstjóri HIV Ísland, Einar Þór Jónsson, skrifaði falleg minningarorð um vin sinn, Björgvin Gíslason sem lést 19. mars síðastliðinn. Segir Einar Þór vin sinn nú kominn til himnaríkis þar sem hann hittir fyrir eiginmann sinn.
„Nú er Bjöggi vinur okkar farinn til himnaríkis og nú er hann með Gunnari Rafni eiginmanni, sem hann saknaði öll árin, þeir eru svo fallegir saman, sé það fyrir mér.
Björgvin Gíslason f. 10. Júlí 1959 d. 19. mars 2025“
Þannig hefst hin fallega Facebook-færsla Einars Þórs. Segir hann því næst að þeir strákar sem eftir séu af „gamla HIV hópnum“ sagni Björgvins og hugsi til hans með þakklæti.
„Við strákarnir sem eftir erum af gamla HIV hópnum söknum Bjögga og hugsum til hans og allra þeirra sem farnir eru með þakklæti. Óslítanleg bönd sem lífsreynslan mikla skapaði okkur, ungum mönnum í trylltum dansi. Góður félagi horfinn, litrík sveifla og skemmtilegur sem skilur eftir sig meðal okkar vina í HIV samtökunum, ótal minningar í gleði og sorg.“
Einar Þór segir ennfremur að vinur hans hafi verið „algjör nagli“:
„Við Bjöggi vorum jafnaldrar. Margt brallað í 40 ár. Bjöggi var svalur, algjör nagli. Hann hefði alveg mátt sína sjálfum sér meiri mildi. Nú er hann laus við veikindi og skelfilegar þjáningar. Það er gott. Góða ferð elsku vinur.“
Einar Þór birti ljósmynd með færslunni sem hægt er að sjá hér fyrir neðan en hann skrifaði eftirfarandi texta um myndina:
„Meðfylgjandi mynd er tekin sumarið 1992 í Finnlandi á þingi fyrir HIV jákvæða. Stig maðurinn minn tók myndina. Við erum svo ótrúlega glöð og samheldin, þrátt fyrir ferlega stöðu sem við vorum í.
Efst. Donni og Gústi frá Köben. Gunni, ég og Bjöggi. Laufey fremst, glöð með okkur strákunum. Árið eftir voru báðir látnir, Gunni Rafn og Gústi.
Útför fer fram frá Fossvogskirkju næstkomandi fimmtudag 3. Apríl kl 13.00.“
