Fuglavernd hefur óskað eftir svörum frá umhverfis-, orku- og loftslagsráðuneytinu vegna leyfisveitingar sem heimilar skotveiðar á bjargdúfum í Vestmannaeyjum. Samtökin hafa miklar áhyggjur af málinu og telja að ekki hafi verið sýnt fram á að aðrar leiðir til að koma í veg fyrir tjón hafi verið fullreyndar.
Stjórn Fuglaverndar hefur sent ráðuneytinu bréf þar sem hún gagnrýnir forsendur leyfisveitingarinnar og kallar eftir skýrari upplýsingum um markmið aðgerðanna og hvernig meta eigi árangur þeirra.
Í bréfinu segir að meint tjón af völdum bjargdúfna sé óljóst og að það hafi ekki verið metið með fullnægjandi hætti áður en heimilað var að drepa fuglana.
Fuglavernd bendir jafnframt á að ekki virðist hafa verið sýnt fram á að aðrar leiðir til að draga úr tjóninu hafi verið fullreyndar. Þar á meðal nefnir félagið að hætta alfarið fóðurgjöfum til dúfnanna.
„Við krefjumst þess að allar aðgerðir sem snúa að drápum á bjargdúfum verði stöðvaðar þar til meint tjón hefur verið metið með fullnægjandi hætti og sýnt fram á að fullreynt sé að aðrar aðgerðir til að draga úr tjóni skili ekki tilætluðum árangri,“ segir meðal annars í bréfinu.
Í því samhengi vísar Fuglavernd til umsagnar Náttúrufræðistofnunar frá 3. september 2025, þar sem fjallað var um umsókn um undanþágu til að leyfa veiðar á dúfum í Vestmannaeyjum.
Samtökin telja mikilvægt að skýrt liggi fyrir hvert markmið skotveiðanna sé og hvernig eigi að mæla árangur þeirra. Þannig verði hægt að ákvarða hvenær markmiðum aðgerðanna hafi verið náð.
Þá lýsir Fuglavernd áhyggjum af því að leyfisveitingin geti skapað fordæmi fyrir sambærilegar aðgerðir í framtíðinni.
„Við teljum mikilvægt að skýrar forsendur liggi að baki ákvörðun um að heimila skotveiðar á bjargdúfum og að markmið, mælikvarðar og mat á árangri séu skilgreind með skýrum hætti,“ segir í bréfinu.
