Íslenskur maður, búsettur í Danmörku, hefur verið ákærður fyrir umferðarlagabrot og líkamsmeiðingar af gáleysi vegna alvarlegs umferðarslyss sem varð í Hvalfjarðarsveit í maí á síðasta ári.

Málið verður þingfest í Héraðsdómi Vesturlands 10. nóvember næstkomandi.

Samkvæmt ákæru ók maðurinn síðdegis föstudaginn 30. maí 2025 eftir Akrafjallsvegi og inn á Vesturlandsveg. Honum er gefið að sök að hafa ekki sýnt nægilega varúð og ekki virt biðskyldu gagnvart umferð á Vesturlandsvegi.

Þar hafi hann ekið í veg fyrir bifreið sem annar íslenskur maður ók suður Vesturlandsveg. Bifreiðarnar rákust harkalega saman og fór bifreið síðarnefnda mannsins út af veginum.

Maðurinn hlaut alvarlega áverka í slysinu. Meðal annars hlaut hann brot á bringubeini, sveif og vinstri sköflungi auk brots í efri hluta sperrileggjar. Þá hlaut hann mar á augnsvæði, brjóstkassa, kviðvegg, vinstri öxl og hné.

Ákæruvaldið telur háttsemina varða við ákvæði almennra hegningarlaga um líkamsmeiðingar af gáleysi auk nokkurra ákvæða umferðarlaga.

Þess er krafist að maðurinn verði dæmdur til refsingar og greiðslu alls sakarkostnaðar. Jafnframt er gerð krafa um að hann verði sviptur ökurétti.