Eldur kviknaði í íbúð í fjölbýlishúsi í Hólahverfi í Reykjavík í kvöld og var einn maður fluttur á slysadeild með reykeitrun og brunasár.

Samkvæmt upplýsingum frá Stefáni Kristinssyni, varðstjóra hjá Slökkviliði höfuðborgarsvæðisins, hefur eldurinn verið slökktur og unnið er að því að reykræsta húsið. Slökkvilið fékk tilkynningu um eldinn um klukkan 21:15.

Eldurinn var afmarkaður við eina íbúð en reykurinn barst út á stigaganginn. Tveir sjúkrabílar voru sendir á vettvang og heilbrigðisstarfsfólk metur nú hvort fleiri hafi orðið fyrir áhrifum af reyknum. RÚV sagði frá málinu.

Sextán ára stúlka sem var í heimsókn hjá vinkonu sinni í blokkinni, þurfti að vaða kolsvartan reik til að komast út á bílaplan. Í samtali við Mannlíf segist hún vera í hálfgerðu sjokki enda ekki lent í neinu slíku áður. „Við vinkonurnar vorum bara inni í herbergi að spjalla þegar pabbi hennar kom inn og sagði að það væri kviknað í,“ sagði stúlkan í samtali við Mannlíf. „Þegar við komum út úr íbúðinni var ekki mikill reykur en það var alveg mikil reyklykt. Þegar við vorum búin að ganga niður þrjá stigapalla á stigaganginum sáum við allt svart, reykur úti um allt.“ Stúlkan segir að hún, vinkonan og pabbi hennar hafi neyðst til að fara í gegnum kolsvartan reykinn en slökkviliðsmenn voru þá mættir á stigaganginn. Eftir að hafa vaðað í gegnum reykinn byrjaði stúlkunni að svima „Ég hélt að það myndi líða yfir mig en kallaði á slökkviliðsmennina „Ég get ekki farið lengra“ en áttaði mig svo á að við vorum eiginlega komin út úr blokkinni.“

Þegar þau voru komin út úr blokkinni brustu vinkonurnar í grát, enda mikið sjokk að lenda í svona eldsvoða. En hvernig líður þér núna? „Bara ágætlega, ég var samt skjálfandi rétt áðan og ennþá smá hrædd.“

Stelpurnar reyndust ekki vera með reykeitrun og mátti vinkonan og faðir hennar fara aftur í íbúð sína en stúlkan sem Mannlíf ræddi við til síns heima.