Þýska lögreglan framkvæmdi í dag umfangsmiklar húsleitir víðs vegar um landið sem beindust að hægrisinnuðum öfgasamtökum ungmenna sem eru grunuð um árásir á vinstrisinnaða einstaklinga og tengsl við kynferðisbrot gegn börnum. Þetta kemur fram í tilkynningu frá ríkissaksóknara Þýskalands.

Hundruð lögreglumanna tóku þátt í aðgerðum þar sem leitað var á fjölda staða í tengslum við rannsókn á 36 grunuðum einstaklingum úr hópunum „Young and Strong“ og „German Youth Forward“.

Engar handtökur voru framkvæmdar í aðgerðunum, en tilgangur húsleitanna var að afla frekari gagna til stuðnings rannsókn málsins.

Samkvæmt saksóknurum eru hinir grunuðu sakaðir um aðild að glæpasamtökum og þátttöku í skipulögðum ofbeldisárásum. Fórnarlömb árásanna hafi í sumum tilvikum hlotið alvarlega áverka eftir barsmíðar.

Yfirvöld segja hópana einnig hafa hvatt til ofbeldis gegn pólitískum andstæðingum. Talið er að samtökin hafi verið starfandi frá því um mitt ár 2024 og að þau séu skipulögð bæði á landsvísu og svæðisbundið.

Saksóknarar greindu ekki frá aldri hinna grunuðu, en staðfestu að meðal þeirra væru ólögráða einstaklingar.

Þýsk stjórnvöld telja hægrisinnaða öfgastefnu vera stærstu öryggisógn sem steðjar að landinu um þessar mundir, meiri en ógnina frá hryðjuverkasamtökum íslamista.

Lögregla í Þýskalandi hefur á undanförnum árum reglulega ráðist í aðgerðir gegn hægrisinnuðum öfgahópum samhliða aukningu í árásum og samsærum tengdum slíkum öfgastefnum.