Sex manns fundust látin í lokuðum vöruflutningavagni lestar í suðurhluta Texas í Bandaríkjunum á sunnudag, samkvæmt fréttum bandarískra fjölmiðla.

Líkin fundust á járnbrautarsvæði nærri landamærum Bandaríkjanna og Mexíkó eftir að starfsmaður vöruflutningafyrirtækisins Union Pacific varð þeirra var við, að sögn lögreglunnar í borginni Laredo, samkvæmt umfjöllun New York Times.

Lögregla rannsakar nú tildrög andlátanna og ekki hefur verið staðfest hvernig fólkið lést. Jose Espinoza, upplýsingafulltrúi lögreglunnar, sagði í samtali við CNN að um afar sorglegan atburð væri að ræða og að mörg mannslíf hefðu tapast.

Mikill hiti var á svæðinu þegar lestin stöðvaðist og fór hitinn upp í um 32 gráður á Celsíus á sunnudag.

Sambærileg atvik hafa áður átt sér stað í Texas. Árið 2023 létust tveir farandmenn eftir að þeir fundust fastir í lest, og árið áður létust 53 farandmenn þegar þeir voru skildir eftir í yfirgefnum flutningabíl á afskekktum vegi í ríkinu, í miklum hita.