Helga Dís Jakobsdóttir hefur verið ráðin framkvæmdastjóri viðskiptasviðs Ísland Duty Free.

Undir viðskiptasviðið heyra meðal annars vörustýring, markaðsmál, aðfangakeðja og birgðastýring. Sviðið gegnir lykilhlutverki í mótun vöruúrvals og upplifunar viðskiptavina.

Helga Dís hefur undanfarna mánuði starfað sem vöruflokkastjóri snyrtivara og sérvöru hjá félaginu. Áður starfaði hún hjá Samkaupum, meðal annars sem þjónustu- og upplifunarstjóri, markaðsstjóri Nettó og vöruflokkastjóri. Þá hefur hún einnig starfað hjá Bláa lóninu og sem rekstrarstjóri veitingastaðarins Hjá Höllu á Keflavíkurflugvelli.

Helga Dís er með meistaragráðu í þjónustustjórnun og BS-gráðu í viðskiptafræði frá Háskóla Íslands. Hún sat jafnframt í bæjarstjórn Grindavíkurbæjar á árunum 2018 til 2024.

„Ég er full tilhlökkunar að taka við þessu spennandi hlutverki,“ segir Helga Dís.