Matt Kwasniewski-Kelvin, gítarleikari hinnar rómuðu bresku tilraunarokkhljómsveitar Black Midi, er látinn, 26 ára að aldri.

Hljómsveitin, sem var stofnuð árið 2017, var hluti af nýrri tónlistarsenu sem mótaðist í kringum tónleikastaðinn Brixton Windmill í Lundúnum. Hún gaf út tónlist í gegnum útgáfufyrirtæki framleiðandans Dan Carey, Speedy Wunderground, sem og Rough Trade Records. Hljómsveitin spilaði meðal annars á Iceland Airwaves árið 2018.

Yfirlýsing frá föður Kwasniewski-Kelvin, Tony, var birt á Instagram-síðu Rough Trade. Þar segir:

„Það er með djúpri sorg sem við sem fjölskylda tilkynnum með mikilli eftirsjá að Matt Kwasniewski-Kelvin er látinn eftir langa baráttu við andlega heilsu sína.

Hæfileikaríkur tónlistarmaður og góðhjartaður, kærleiksríkur maður gafst að lokum upp, þrátt fyrir allar tilraunir. Matt var 26 ára gamall. Hann mun ávallt vera elskaður. Vinsamlegast gefið ykkur tíma til að hafa samband við ykkar nánustu svo við getum komið í veg fyrir að þetta gerist fyrir unga menn.“

Með yfirlýsingu fjölskyldunnar fylgdi einnig skilaboð frá Rough Trade, þar sem segir:

„Rough Trade Records vill votta fjölskyldu Kwasniewski-Kelvin dýpstu samúð eftir að hafa deilt þessari yfirlýsingu um hið sorglega fráfall stofnmeðlims Black Midi, Matt, einstaklega hæfileikaríks manns sem verður sárt saknað.

Ef þú átt í erfiðleikum með andlega heilsu, vinsamlegast leitaðu til ástvina þinna eða til góðgerðarsamtaka á borð við Mind, CALM og Samaritans, sem bjóða upp á stuðning og einhvern til að tala við þegar þörf er á.“

Kwasniewski-Kelvin stundaði nám við hinn virta listaskóla The Brit School. Þar kynntist hann gítarleikaranum Geordie Greep og trommuleikaranum Morgan Simpson. Þeir stofnuðu saman Black Midi, og síðar gekk bassaleikarinn Cameron Picton til liðs við hljómsveitina.

Sveitin hélt sína fyrstu tónleika á Brixton Windmill 12. júní 2017 og fékk síðar fasta aðstöðu þar. Í júní 2018 gaf hún út fyrstu smáskífuna „bmbmbm“ á Speedy Wunderground. Fyrsta plata sveitarinnar, Schlagenheim, kom út árið 2019 á vegum Rough Trade Records.

Í umfjöllun fyrir The Independent árið 2020 skrifaði Kieran Read:
„Þegar Black Midi flutti smáskífuna ‘bmbmbm’ á Mercury-verðlaunahátíðinni árið áður, í sinni fyrstu sjónvarpsútsendingu, þóttu vandræðalegar stunur Geordie Greep söngvara og óvænt heljarstökk gítarleikarans Matt Kwasniewski-Kelvin ögrandi og ruglandi, jafnvel meira en þegar rapparinn Slowthai kastaði afhöfðuðu höfði Borisar Johnson um sviðið.“

Read bætti við að meðlimir sveitarinnar deili „ástríðu fyrir því að djamma óregluleg, ofsafengin grúv og notast við óhefðbundin hljóðbrot (eins og taugaáföll Nikki Grahame í Big Brother) í gegnum magnarana sína. Eftir nokkra ótrúlega mánuði, þar á meðal samning við Rough Trade Records, loftþéttan flutning hjá KEXP og stuðningsyfirlýsingu frá Damo Suzuki úr Can, voru þeir fljótt hylltir sem „skrýtnasta hljómsveitin“, sem jók bara athyglina á þeim.“

Kwasniewski-Kelvin yfirgaf hljómsveitina fyrir útgáfu annarrar plötu hennar, Cavalcade, árið 2021 og vísaði þá til áhyggja af andlegri heilsu sinni. Hann hlaut þó laun fyrir lagasmíðar á plötunni.

Meðal þeirra sem minntust tónlistarmannsins voru fulltrúar Brixton Windmill, sem skrifuðu á X:

„Hvíl í friði, Matt Kwasniewski-Kelvin. Ég veit ekki hvað annað er hægt að segja en að votta fjölskyldu hans dýpstu samúð og hvetja alla til að hlusta á ráð þeirra. Þetta er ákaflega sorglegt.“