Fyrrverandi rannsakandi sem naut fjárstuðnings frá CIA heldur því fram að bandarísk stjórnvöld hafi endurheimt fjórar mismunandi tegundir geimvera úr brotlentum óþekktum fljúgandi furðuhlutum.
Dr. Harold Puthoff, sem áður starfaði sem ráðgjafi fyrir rannsóknarverkefnið Advanced Aerospace Weapon System Applications Program, lét ummælin falla í hlaðvarpsþættinum The Diary of a CEO ásamt leikstjóranum Dan Farah. New York Post fjallaði um málið.
„Fólk sem hefur komið að endurheimtum hefur sagt að um að minnsta kosti fjórar tegundir sé að ræða. Fjórar aðskildar tegundir,“ sagði hinn 89 ára gamli Puthoff.
Hann tók þó fram að hann hefði ekki sjálfur haft beina aðkomu að slíkum gögnum, en segðist treysta þeim heimildarmönnum sem hann hefði rætt við.
Fyrrverandi samstarfsmaður hans, Eric Davis, hélt því fram í fyrra að um væri að ræða tegundir sem kallaðar væru Grays, Nordics, Insectoids og Reptilians.
„Hver geimverutegund hefur tvo handleggi og fætur og manneskjulegt útlit,“ sagði Davis og vitnaði í leyniþjónustuskýrslur.
Nordics eru sagðar líkjast fólki frá Norður-Evrópu þrátt fyrir að vera frá fjarlægri plánetu, á meðan Reptilians eru lýst sem skriðdýralíkum verum með hreistraða húð og langa hala.
Grays eru hins vegar sagðar litlar, hárlausar verur með stór augu, líkt og oft hefur verið sýnt í kvikmyndum á borð við Close Encounters of the Third Kind.
Insectoids eru svo sagðar líkjast risastórum skordýrum eða bænabeiðum.
Fyrrverandi leyniþjónustumaður bandaríska flughersins, David Grusch, bar vitni undir eiði fyrir bandaríska þinginu árið 2023 og hélt því fram að bandarísk stjórnvöld hefðu yfir að ráða „líffræðilegum leifum sem væru ekki af mannlegum uppruna“ úr tugum brotlentra furðuhluta.
Þær fullyrðingar byggðu meðal annars á frásögnum einstaklinga sem sagðir eru hafa tekið þátt í leynilegu verkefni tengdu endurheimt slíkra farartækja, en fjallað er um það í heimildarmynd Farah, Age of Disclosure, sem frumsýnd var í mars.
Farah sagði í hlaðvarpsþættinum að hann hefði rætt við fólk sem tengdist slíkum endurheimtum, en að margir óttuðust að tjá sig opinberlega.
„Einn þeirra ætlaði að koma í viðtal en sendi mér svo skilaboð nokkrum dögum áður og sagði: „Eftir frekari umhugsun og löng samtöl við eiginkonu mína hef ég ákveðið að ég myndi fórna lífi mínu ef ég tæki þátt í þessu viðtali,““ sagði Farah.
