Hvíta húsið hyggst hefja birtingu langþráðra gagna um fljúgandi furðuhluti og líf frá öðrum hnöttum á föstudag, nokkrum mánuðum eftir að Donald Trump skipaði æðstu embættismönnum að hefja undirbúning að birtingu slíkra upplýsinga.
Tímasetningin kom fram á fundi í Vesturálmu Hvíta hússins í gær, þar sem meðal annars var viðstaddur þingmaðurinn Tim Burchett, sem situr í nefnd sem vinnur að afléttingu leyndar á ríkisskjölum.
„Þetta byrjar á morgun. Þar verða upplýsingar frá flugmönnum og mögulega eitt myndband,“ sagði Burchett í samtali við blaðamann.
Heimildir herma að um sé að ræða frásagnir bandarískra herflugmanna sem hafa orðið vitni að óþekktum fyrirbærum á flugi.
Fyrsta birtingin mun þó ekki innihalda þau 46 myndskeið sem þingið hefur krafist að verði gerð opinber.
Gert er ráð fyrir að fleiri gögn verði birt í vikulegum skömmtum, í stað þess að öllu verði sleppt í einu eins og gert var í sumum öðrum málum.
Burchett segir að enn sé andstaða innan þingsins við birtinguna, en telur engu að síður að loforð Trumps verði efnt.
„Ég styð forsetann heilshugar og er þakklátur fyrir að hann standi við orð sín og leggi áherslu á gagnsæi,“ sagði hann og bætti við að birting gagna muni taka tíma.
