Áhrifamiklir prestar og predikarar halda því fram að þeim hafi verið sagt að búa fylgjendur sína undir átakanlegar uppljóstranir um fljúgandi furðuhluti sem gætu kollvarpað trú á Biblíuna.
Bandaríski predikarinn Perry Stone heldur því fram að nokkrir prestar hafi nýlega verið boðaðir á leynifund með bandarískum leyniþjónustuyfirvöldum. Þar hafi þeir verið undirbúnir fyrir væntanlega birtingu skjala og hugsanlega myndbönd af geimverum og geimförum sem væru ekki frá þessari plánetu.
Í myndbandi sem birt var 27. apríl á YouTube-rás hans, hélt predikarinn því fram að prestum hefði verið sagt frá tilvist „skriðdýravera“, fljúgandi furðuhluta og efna af ómennskum uppruna og „öðru sem hljómar næstum eins og eitthvað úr vísindaskáldsögu“.
Hann segir yfirvöld hafa varað við því að slíkar upplýsingar gætu haft áhrif á trú fólks. „Þú munt sjá fólk halda því fram að ef til séu aðrar verur og vetrarbrautir þá sé sköpunarsagan goðsögn,“ sagði Stone og bætti við að sumir gætu snúið baki við kristinni trú.
Einnig hafi verið varað við því að fólk utan trúarbragða gæti brugðist við með ótta og leitað svara hjá kirkjum og trúarleiðtogum.
Samkvæmt frásögnum voru um sex kristnir leiðtogar á fundinum, þar á meðal Alan DiDio, sem staðfesti þátttöku sína. Hann sagði umræðuna hafa snúist um rannsóknir bandarískra yfirvalda á meintum samskiptum við ómannlega tækni og áform um hvernig upplýsingarnar yrðu kynntar almenningi.
Annar þátttakandi, Tony Merkel, sagði yfirvöld hafa haft áhyggjur af áhrifum slíkra upplýsinga á trúarbrögð. Hann sagði markmiðið hafa verið að undirbúa kristið fólk fyrir það sem framundan er.
Sumir prestar telja að væntanlegar upplýsingar gætu verið hluti af stærra samsæri til að draga fólk frá kristinni trú og líkja því við „mikla blekkingu“ sem lýst er í Biblíunni.
Á sama tíma hafa sumir stjórnmálamenn tengt mögulega tilvist slíkra vera við trúarlegar hugmyndir. Varaforseti Bandaríkjanna, JD Vance, sagði til dæmis nýlega: „Ég held að þetta séu ekki geimverur, ég held að þetta séu djöflar.“
Þingkonan Anna Paulina Luna hefur einnig hvatt fólk til að kynna sér forn trúarrit og telur að lýsingar á „millivíddarverum“ kunni að eiga sér samsvörun í eldri textum.
Hún sagði í viðtali að hún hefði séð gögn sem bentu til þess að til væru loftför sem ekki væru smíðuð af mönnum og að slík fyrirbæri gætu tengst sögulegum frásögnum allt aftur til tímabils fyrir fæðingu Krists.
