Ekki eru allir jafn sáttir við Kvennaverkfallið sem haldið verður á föstudaginn næstkomandi og er alþjóðastjórnmálafræðingurinn Glúmur Baldvinsson einn af þeim en hann telur það óþarft.

„Yfirvofandi verkfall kvenna í landi þar sem kona er forsætisráðherra, forseti, biskup og lögreglustjóri er vissulega áhyggjuefni,“ skrifar Glúmur um málið á samfélagsmiðlum. „Verra en verkfall flugumferðarstjóra og innrás moskítóflugna. En þá fyrst keyrir úr hófi þegar kvár ætla einnig að láta að sér kveða og boða verkstopp. Þá fyrst er tólfunum kastað og þá fyrst hriktir í stoðum íslensks samfélags. Og þá fyrst er fokið í flest skjól,“ heldur hann áfram.

„Ég er orðinn afar þreyttur á þessu kjaftæði í landi sem mælist trekk í trekk og ár eftir ár hæst í heiminum þegar kemur að jafnrétti kynjanna,“ skrifar Glúmur svo í athugasemdum.