Grímuklæddur maður nálgaðist hinn fallna fyrrverandi prins, Andrew Mountbatten Windsor, við heimili hans á Sandringham-setrinu í Norfolk. Lögreglan sagði að maður hefði verið handtekinn fyrir vörslu hættulegs vopns.
Samkvæmt lögreglu var maður handtekinn grunaður um að hafa verið með hættulegt vopn á sér. Atvikið átti sér stað um klukkan 19:30 í gærkvöld þegar Andrew var á göngu með hundana sína nærri heimili sínu á landi Sandringham House.
Talið er að maðurinn hafi stokkið út úr ökutæki og hrópað að fyrrverandi hertoganum af Jórvík. Andrew og öryggisvörður hans flúðu þá í bifreið sem var í grenndinni. Heimildir herma að maðurinn hafi hlaupið á eftir bílnum þegar hann ók burt frá svæðinu.
Lögreglan í Norfolk segir að lögregla hafi verið kölluð á vettvang og maðurinn handtekinn skömmu síðar. Hann var fluttur á lögreglustöð til yfirheyrslu og er enn í haldi.
Lögregla segir málið ekki rannsakað sem hryðjuverk, en ein kenning rannsakenda er að um sé að ræða einstakling sem hafi verið haldinn þráhyggju gagnvart Andrew.
Andrew missti rétt sinn til ríkisfjármagnaðrar lögregluverndar árið 2022 eftir að hann var sviptur konunglegum titlum sínum í kjölfar einkamáls sem tengdist Virginia Giuffre. Hann hefur síðan greitt fyrir einkaverði með fjármunum sem hann fær frá bróður sínum, Karli III til framfærslu.
Öryggismál við Sandringham-setrið hafa verið hert undanfarin ár, meðal annars eftir að drónar sáust fljúga yfir svæðið þegar Volodymyr Zelensky heimsótti Bretland.
