Grímur Grímsson, þingmaður Viðreisnar og fyrrverandi lögreglumaður tjáir sig ekki um ásakanir Sigurðar Þórðarsonar, eða Sigga hakkara eins og síbrotamaðurinn er kallaður.

Siggi hakkari er nýjasti gestur Frosta Logasonar í hlaðvarpsþætti hans Á spjalli við Frosta Logason á Brotkastinu. Fullyrti hakkarinn og síbrotamaðurinn að sérstakur saksóknari hafi fengið hann, þá 17 ára gamlan, til þess að brótast inn í einkafyrirtæki og afrita gögn úr tölvum þeirra. Spilaði hann brot úr leyniupptökum í viðtalinu, þar sem hann segir Grím Grímsson hafa farið yfir með honum hvernig hann ætti að svara yfirheyrslum lögreglunnar en þá hafði Siggi verið handtekinn vegna gagnaleka Milestone.

Mannlíf hafði samband við Grím Grímsson en þingmaðurinn svaraði því til að þar sem mál væru til rannsóknar hjá lögreglu og til skoðunar hjá nefnd á alþingi, muni hann ekki tjá sig um málið á meðan rannsóknin er í gangi.

Hér má lesa skriflegt svar Gríms í heild sinni:

„Nú er staðan þannig að mál eru til rannsóknar hjá lögreglu, til skoðunar hjá nefnd um eftirlit með lögreglu og dómsmálaráðherra hefur óskað eftir tilteknum upplýsingum frá héraðssaksóknara, áður sérstökum saksóknara. Þá er Stjórnskipunar- og eftirlitsnefnd Alþingis með til skoðunar atriði sem tengjast gagnaleka þeim sem virðist vera upphaf allra þessara skoðana.  Svo því sé til haga haldið er ég kjörinn í Stjórnskipunar – og eftirlitsnefnd Alþingis sem Alþingismaður en tek ekki þátt í störfum nefndarinnar er lítur að þessu máli.  Ég mun ekki tjá mig opinberlega um neitt það sem kann að verða hluti af þessum rannsóknum og athugunum framangreindra aðila á meðan á rannsóknunum stendur.“