Hala Mounir Mohammad, 30 ára hárgreiðslukona og áhrifavaldur á samfélagsmiðlum, hefur verið handtekin í Sýrlandi grunuð um pyntingar og ofbeldi gegn föngum í tíð stjórnar Bashar al-Assad.

Samkvæmt frásögnum fyrrverandi fanga starfaði hún undir nafninu „Mounira“ sem fangavörður í hinu alræmda al-Mazzeh-fangelsi í Damaskus.

Eftir fall stjórnar Assads árið 2024 hófu ný stjórnvöld leit að einstaklingum sem tengdust pyntingum og mannréttindabrotum í fangelsiskerfi landsins. Talið er að yfir 100 þúsund manns hafi horfið í borgarastríðinu í Sýrlandi, margir þeirra innan fangelsiskerfis stjórnarinnar.

Í al-Mazzeh-fangelsinu einu saman eru um þúsund fangar sagðir hafa látist.

Lögregla réðst inn á hárgreiðslustofuna „Minn engill“ þar sem Hala starfaði og handtók hana. Hún mun nú sæta réttarhöldum vegna meintra pyntinga og illrar meðferðar á föngum.

Tímaritið New Lines Magazine ræddi við nokkrar konur sem sátu í fangelsinu og lýstu ótta sínum við „Mouniru“.

Fyrrverandi fanginn Hiba segir Hala hafa státað sig af því hve marga hún hefði drepið sem leyniskytta í hernum.

„Hún sagði margar sögur af því hvað hún hefði verið glöð þegar hún skaut fólk,“ sagði Hiba.

Samkvæmt vitnisburði annarra fanga voru „fallegustu stelpurnar“ sérstaklega teknar fyrir. Fangar voru meðal annars látnir velja á milli tveggja refsinga: pyntingaaðferðar sem kölluð var „dekkið“ eða skæra.

Hiba segir að fangarnir hafi valið skærin af ótta við hitt.

„Hún greip harkalega í hárið á okkur og hló á meðan hún klippti af stórar flygsur,“ sagði hún. „Hláturinn var það sem einkenndi hana mest. Hún naut þessa.“

Vitni segja Hala hafa unnið árum saman bæði sem fangavörður og hárgreiðslukona.

Hún er meðal annars sökuð um að hafa barið fanga með grænum plastprikum og notað loftræstikerfi fangelsisins sem refsingu, með því að kæla klefa á köldum nóttum og slökkva á kælingu í miklum hita.

Þrátt fyrir fall stjórnar Assads hafði Hala áfram dvalið í Damaskus og sagðist hafa náð sáttum við ný stjórnvöld í gegnum sérstakt „sáttarferli“ fyrir fyrrverandi stuðningsmenn stjórnarinnar.

Hún var þó handtekin 18. mars og er nú grunuð um fjölda glæpa gegn föngum á valdatíma Assads.