Héraðsdómur Reykjavíkur hefur vísað frá kröfum söngkonunnar Bríetar Ísis Elfar á hendur lagahöfundinum Pálma Ragnari Ásgeirssyni og þrotabúi Líms og varahluta ehf. Bríet krafðist rúmlega sjö milljóna króna vegna meintra vangoldinna höfundarréttar-, útgáfuréttar- og rétthafagreiðslna sem hún taldi sig eiga inni vegna samstarfs þeirra.

Bríet og Pálmi unnu saman að tónlistargerð um árabil. Deilan laut að tekjum og réttindum sem urðu til á samstarfstímanum.

Í dómi Héraðsdóms kemur fram að verulegir annmarkar hafi verið á kröfugerð og málatilbúnaði Bríetar. Dómurinn taldi að kröfurnar fullnægðu hvorki skilyrðum einkamálalaga né þeim kröfum sem gerðar eru við kröfulýsingar í gjaldþrotaskiptum.

Jafnframt var talið að Bríet hefði breytt kröfugerð sinni umfram heimildir laga með því að setja fram nýjar og breyttar kröfur á síðari stigum málsins. Henni var því gert að greiða samtals 900 þúsund krónur í málskostnað.