Christian Brueckner, sem þýsk yfirvöld gruna um að vera valdur af hvarfi Madeleine McCann árið 2007, hefur verið handtekinn eftir að hafa lent í slagsmálum við annan mann í Þýskalandi.

Lögreglan í norður-þýsku borginni Kiel staðfesti við AFP að hún hefði hafið „sakamálarannsókn vegna gruns um líkamsárás á báða bóga“ gegn Christian Brueckner og annarri óþekktri persónu eftir augljós átök. Lögreglan neitaði að veita frekari upplýsingar.

Samkvæmt þýska blaðinu Bild áttu slagsmálin sér stað 20. apríl eftir að Brueckner á að hafa klifrað yfir girðingu inn á einkalóð nærri heimili sínu í Kiel.

Blaðið segir að á hann hafi verið ráðist „af óþekktum einstaklingi, líklega eiganda lóðarinnar, og hann sleginn hnefahöggum“. Brueckner hafi síðan slegið til baka áður en hann sjálfur hafði samband við lögreglu.

Brueckner, sem er 49 ára, var árið 2020 formlega nefndur sem sá sem helst er grunaður í hvarfi Madeleine McCann af þýskum saksóknurum. Þrátt fyrir það hefur hvorki hann né nokkur annar verið ákærður í málinu.

Þýsk yfirvöld sögðust á sínum tíma hafa „áþreifanleg sönnunargögn“ sem tengdu hann við málið, en ekki nægilega sterk til að tryggja sakfellingu.

Madeleine, sem kölluð var Maddie, var þriggja ára þegar hún hvarf úr sumarleyfisíbúð fjölskyldu sinnar í Praia da Luz í Algarve-héraði í Portúgal í maí 2007, á meðan foreldrar hennar snæddu á veitingastað skammt frá.

Engin ummerki um stúlkuna hafa nokkurn tímann fundist.

Brueckner dvaldi reglulega á svæðinu á þessum tíma og samkvæmt rannsakendum sendi farsími skráður á hans nafni frá sér staðsetningarmerki nálægt íbúð fjölskyldunnar kvöldið sem Madeleine hvarf.

Hann var látinn laus úr fangelsi í Þýskalandi í september síðastliðnum eftir að hafa afplánað dóm í nauðgunarmáli. Hann á einnig að baki fjölda sakfellinga fyrir meðal annars þjófnað, fíkniefnasölu, líkamsárásir, vörslu barnaníðsefnis og ofbeldi gegn börnum.