Hljómsveitin VÆB mun frumflytja lag Barnamenningarhátíðar 2026 í Breiðholtsskóla miðvikudaginn 15. apríl kl. 12:30, að viðstöddum nemendum skólans en þetta kemur fram í tilkynningu frá Reykjavíkurborg.
Meðlimir sveitarinnar eru bræðurnir Matthías Davíð Matthíasson og Hálfdán Helgi Matthíasson, og munu þeir flytja lagið Sama hver það er í fyrsta sinn.
Þema Barnamenningarhátíðar í ár er „samkennd og samfélag“. Nemendur í 4. bekk í Reykjavík fengu það verkefni að velta fyrir sér þessum hugtökum og svara spurningum um merkingu þeirra. Texti lagsins byggir á hugmyndum og svörum barnanna sjálfra.
Barnamenningarhátíð fer fram dagana 20.–26. apríl og býður upp á fjölbreytta dagskrá um alla borg. Á hverju ári taka um 10.000 börn þátt í hátíðinni með einum eða öðrum hætti. VÆB mun einnig flytja lagið við setningu hátíðarinnar í Eldborgarsal Hörpu þann 20. apríl, fyrir fullum sal af börnum.
Viðburðir hátíðarinnar fara fram víðs vegar um borgina og eru ætlaðir börnum og fjölskyldum þeirra. Aðgangur er ókeypis á alla viðburði.
