Glæsilegt og mikið endurnýjað einbýlishús við Skipasund 77 í Laugardalnum í Reykjavík hefur verið sett á sölu.
Um er að ræða 186,9 fermetra eign sem reist var árið 1956, auk 15 fermetra frístandandi bjálkahúss sem nýtt er sem fjölskyldulíkamsrækt. Ásett verð eignarinnar er 159,9 milljónir króna.
Það eru hjónin Halldóra Fanney Jónsdóttir og Andri Steinn Guðmundsson sem eiga þetta glæsielga hús en þau eru meðeigendur í Aurora Igloo en Andri sér um að reka hótelið auk Aurora Basecamp. Þá er Halldóra verkefnastjóri hjá markaðsdeild N1.
Húsið hefur að stórum hluta verið endurnýjað á síðustu árum, bæði að innan sem utan. Samkvæmt upplýsingum úr söluyfirliti hefur rafmagn verið endurnýjað ásamt nýrri rafmagnstöflu og tenglum. Þá hafa pípulagnir verið endurnýjaðar og gólfhiti settur í allt húsið, auk ofna á baðherbergjum og í forstofu á neðri hæð. Einnig var skólp endurnýjað, þar á meðal lagnir frá húsi út í götu.
Á efri hæð hússins eru forstofa, sjónvarpsherbergi, stofa, eldhús, borðstofa og baðherbergi. Úr stofu er gengið út á svalir með aðgengi niður í stóran og vel frágenginn garð. Á neðri hæð eru forstofa, hol, þvottaherbergi, þrjú svefnherbergi og baðherbergi.
Í garðinum eru geymsla, tvær einstaklingsíbúðir og sérstakt líkamsræktarhús. Þá hefur lóðin verið tekin í gegn með upphitaðri hellulögn, pöllum og skjólgirðingum.
