Bandarísku samtökin Students for Liberty, sem starfa að útbreiðslu frjálshyggjuhugmynda, hafa verið virk á Íslandi undanfarin ár en greint er frá þessu í Heimildinni.

Samtökin eru fjármögnuð í gegnum net tengdra félaga sem njóta meðal annars stuðnings bandaríska milljarðamæringsins Charles Koch.

Orðið hefur vart við aukna þátttöku áhrifafólks úr Miðflokknum í starfi samtakanna hér á landi, en samtökin hafa áður einkum verið tengd fólki úr Sjálfstæðisflokknum. Vekur þetta athygli í ljósi þess að flokkurinn hefur hingað til talað gegn því að fólk sem ekki býr á Íslandi hafi áhrif á menningu og íslensk lög og stjórnmál.

Breki Atlason, alþjóðafulltrúi Miðflokksins, gegnir nú hlutverki leiðtoga Students for Liberty á Íslandi. Hann sækist jafnframt eftir sæti á lista Miðflokksins fyrir komandi borgarstjórnarkosningar sem haldnar verða í vor.

Breki hefur staðið að skipulagningu ráðstefna þar sem áhrifafólk af hægri væng stjórnmálanna, bæði innanlands og erlendis, hefur tekið þátt. Samkvæmt opinberri stefnu Students for Liberty styðja samtökin viðburði sem fulltrúar þeirra um heim allan standa fyrir, og má ætla að umræddar ráðstefnur njóti stuðnings frá alþjóðaskrifstofu samtakanna.

Breki vildi ekki svara spurningum Heimildarinnar um málið.