Ísraelskur dómstóll hefur framlengt gæsluvarðhaldi yfir tveimur aðgerðasinnum sem voru handteknir um borð í hjálparskipaflota á leið til Gaza, sem stöðvuð var af ísraelskum hersveitum á alþjóðlegu hafsvæði nærri Grikklandi á dögunum.
Um er að ræða Saif Abu Keshek, spænskan ríkisborgara, og Brasilíumanninn Thiago Avila, sem voru handteknir af ísraelskum yfirvöldum 29. apríl og fluttir til Ísraels. Yfir 100 aðrir stuðningsmenn Palestínu sem voru um borð í skipunum voru hins vegar fluttir til grísku eyjunnar Krít.
Gæsluvarðhald þeirra hafði upphaflega verið framlengt til 5. maí, en dómstóll í Ashkelon hefur nú framlengt það til 10. maí.
Aðgerðasinnarnir voru hluti af svokölluðum Global Sumud-flota sem hafði það markmið að rjúfa hafnbann Ísraels á Gaza með því að flytja þangað mannúðaraðstoð. Skipin lögðu af stað frá Barcelona 12. apríl.
Í dómskjölum kemur fram að Ísrael sakar þá Abu Keshek og Avila um brot, þar á meðal aðstoð við óvininn, samskipti við erlendan útsendara og hryðjuverkasamtök, ólöglegt athæfi sem felur í sér hryðjuverkastarfsemi og að útvega hryðjuverkasamtökum fjármuni.
Dómarinn Yaniv Ben-Haroush sagði að „rökstuddur grunur“ væri fyrir hendi þegar hann samþykkti framlengingu gæsluvarðhaldsins.
Tilhæfulausar ásakanir
Lögmenn mannréttindasamtakanna Adalah mótmæltu hins vegar og sögðu ásakanirnar tilhæfulausar og að engin lagaleg rök væru fyrir áframhaldandi varðhaldi mannanna. Þeir bentu á að engar formlegar ákærur hefðu verið lagðar fram og að varðhaldið væri eingöngu vegna yfirheyrslna.
Samtökin sögðust ætla að áfrýja ákvörðuninni og krefjast tafarlausrar og skilyrðislausrar lausnar mannanna. Þau fullyrtu einnig að mennirnir hefðu verið beittir pyntingum í haldi, en Ísrael hafnar þeim ásökunum.
Eiginkona Abu Keshek, Sally Issa, sagði í samtali við Reuters 5. maí að hún hefði ekki fengið að tala beint við mann sinn frá handtöku og byggði upplýsingar sínar á samskiptum við spænska ræðismanninn og lögmenn.
„Þau hafa sagt okkur að hann sé í góðu ástandi. Hann er í hungurverkfalli,“ sagði hún. „En hann er í lagi. Hann varð fyrir pyntingum um borð í skipinu þegar Ísraelar réðust á hann.“
Spánn krefst lausnar
Utanríkisráðuneyti Ísraels hefur sagt að mennirnir tengist palestínsku samtökunum Hamas og að flotinn sé „enn ein ögrunin sem ætlað er að beina athyglinni frá því að Hamas neiti að afvopnast“.
Talsmaður ráðuneytisins hafnaði ásökunum um pyntingar og kallaði þær „rangar og tilhæfulausar“.
„Eftir að Saif Abu Keshek og Thiago Avila beittu líkamlegu ofbeldi gegn starfsmönnum Ísraels neyddust þeir til að grípa til aðgerða til að stöðva það. Allar aðgerðir voru í samræmi við lög,“ sagði hann.
Spænski utanríkisráðherrann Jose Manuel Albares krafðist tafarlausrar lausnar Abu Keshek og sagði engin gögn benda til tengsla hans við Hamas.
Albares sagðist hafa sagt ísraelska starfsbróður sínum, Gideon Saar, að varðhald aðgerðasinnanna væri ólöglegt þar sem Ísrael hefði ekki lögsögu á alþjóðlegum hafsvæðum.
Eiginkona Avila, Lara Souza, sagði að maður hennar væri á sjötta degi hungurverkfalls og undir eftirliti lækna.
„Hann er skárri af meiðslunum, en mjög veikburða, og sendiráðið hefur miklar áhyggjur,“ sagði hún.
Vegna hungurverkfallsins fyrirskipaði dómstóllinn fangelsisyfirvöldum í Ísrael að fylgjast náið með heilsufari fanganna.
