Ráðherrar í ísraelsku ríkisstjórninni og þingmenn tóku þátt í göngu að landamærum Gaza á sunnudag þar sem þeir kröfðust þess að gyðingabyggðir yrðu reistar á ný á hernumdu palestínsku landsvæði.
Gangan fór fram þrátt fyrir að ísraelski herinn hefði á síðustu stundu takmarkað leið hennar og lýst svæðið lokað hernaðarsvæði vegna ótta um að þátttakendur hygðust fara yfir landamæragirðinguna inn á Gaza.
Mótmælagangan er talin enn eitt merkið um að hugmyndir um að endurreisa ísraelskar landnemabyggðir á Gaza hafi færst úr jaðri stjórnmálanna yfir í meginstraum í ísraelskri umræðu.
Flokkur Benjamíns Netanjahús forsætisráðherra, Likud, var skráður meðal stuðningsaðila göngunnar, þrátt fyrir að Netanjahú hafi ítrekað sagt að ekki standi til að endurreisa landnemabyggðir á Gaza.
Landnemasamtökin Nachala stóðu að viðburðinum, sem þau kölluðu „Göngu þúsundanna“. Samtökin fullyrtu að yfir 10.000 manns hefðu tekið þátt, en ísraelskir fjölmiðlar töldu fjöldann fremur nema nokkrum hundruðum.
Nachala eru undir stjórn Daniellu Weiss, sem hefur lengi barist fyrir því að Ísrael endurreisi landnemabyggðir á Gaza. Á ráðstefnu Likud-flokksins sagði hún að Palestínumenn myndu „hverfa“ af svæðinu.
Sumir þátttakendur komust að landamærunum með því að fara fram hjá eftirlitsstöðvum um nærliggjandi hæðir. Myndskeið sem Al Jazeera sannreyndi sýnir tugi Ísraela safnast saman við girðinguna að Gaza.
Meðal þátttakenda voru einnig Bezalel Smotrich fjármálaráðherra, sem fer jafnframt með málefni landnemabyggða, og Itamar Ben-Gvir þjóðaröryggisráðherra, auk rúmlega tveggja tuga ráðherra og þingmanna, samkvæmt ísraelskum fjölmiðlum.
Smotrich og Ben-Gvir hafa sætt refsiaðgerðum frá nokkrum Evrópuríkjum.
Undir slagorðinu „Heim aftur eftir 21 ár“ kröfðust þátttakendur þess að landnemabyggðirnar Elei Sinai, Dugit og Nisanit yrðu reistar á ný. Byggðirnar voru lagðar niður þegar Ísrael dró herlið sitt og landnema frá Gaza árið 2005.
Ben-Gvir birti myndband af sér úr göngunni með textanum: „Gaza er okkar.“ Smotrich hvatti jafnframt Ísraela til að láta ekki „sögulegt tækifæri“ til að endurreisa byggðir á Gaza fram hjá sér fara.
Palestínski lögfræðingurinn og stjórnmálaskýrandinn Diana Buttu sagði í samtali við Al Jazeera að skortur á ábyrgð hefði gert Ísrael kleift að halda áfram landnemastefnu sinni.
„Þar sem Ísrael hefur aldrei verið refsað fyrir glæpi sína er eðlilegt að ríki sem fremur þjóðarmorð og þjóðernishreinsanir telji sig geta gengið enn lengra og stolið meira landi,“ sagði hún.
Í desember fóru nokkrir aðgerðasinnar frá Nachala yfir landamærin inn á Gaza í stutta stund og reistu þar ísraelskan fána áður en ísraelskir hermenn fylgdu þeim aftur yfir girðinguna.
