Avi Bluth, yfirmaður miðherstjórnar ísraelska hersins á hernumda Vesturbakkanum, sagði á lokuðum fundi að ísraelski herinn væri að drepa Palestínumenn í meira mæli en sést hafi frá árinu 1967. Þetta kemur fram í umfjöllun ísraelska dagblaðsins Haaretz.
Bluth varði jafnframt rýmri reglur um valdbeitingu sem heimila hermönnum að skjóta á óvopnaða Palestínumenn við ákveðnar aðstæður. Hann viðurkenndi einnig að mismunandi sé tekið á málum eftir því hvort um sé að ræða Palestínumenn eða ísraelska landtökumenn.
„Á þremur árum höfum við drepið 1.500 hryðjuverkamenn,“ sagði Bluth og átti þar við Palestínumenn. Hann bætti við: „Arabar skilja að „ef einhver rís upp til að drepa þig, drepur þú hann fyrst“ er hluti af reglum Miðausturlanda og þess vegna erum við að drepa eins og við höfum ekki drepið síðan 1967.“
Samkvæmt upplýsingum frá Samræmingarskrifstofa mannúðarmála hjá Sameinuðu þjóðunum hafa ísraelskar hersveitir drepið 1.081 Palestínumann á Vesturbakkanum og í Austur-Jerúsalem frá 7. október 2023, þar af að minnsta kosti 235 börn.
Bluth sagði að hátt dánartal tengdist skipunum sem hann hefði gefið um auðveldari heimildir til skotvopnanotkunar. Meðal annars væri hermönnum heimilt að skjóta Palestínumenn í fætur ef þeir reyndu að fara yfir aðskilnaðargirðingu Vesturbakkans.
Hann sagði einnig að hermenn skytu ekki á ísraelska landtökumenn sem köstuðu grjóti vegna „félagslegra afleiðinga“, á meðan Palestínumenn sem gerðu slíkt væru skotnir. Að hans sögn voru 42 Palestínumenn sem sakaðir voru um grjótkast drepnir árið 2025.
Ummælin hafa vakið mikla athygli í Ísrael, meðal annars meðal róttækra landtökumanna á Vesturbakkanum sem hafa gagnrýnt Bluth fyrir að vera of linur gagnvart alþjóðlegum þrýstingi.
Á sama tíma greindu samtökin Peace Now frá því að ísraelsk stjórnvöld hefðu úthlutað um 130 milljónum sikla til hópa tengdra landtökumönnum undir formerkjum þess að draga úr ofbeldi. Samtökin segja fjármununum í raun ætlað að styrkja landtökubyggðir og starfsemi hópa sem standi að baki ofbeldi gegn Palestínumönnum.
„Ríkisstjórnin notar allar afsakanir til að réttlæta að dæla sífellt fleiri milljónum í landnemabyggðir. Þetta er áætlun til að stækka landnemabyggðir undir því yfirskini að berjast gegn ofbeldi,“ sagði í yfirlýsingu frá Peace Now. „Ríkisstjórnin beinir verulegum hluta fjármunanna til sömu aðila og starfsemi sem nú þjóna sem helstu stuðningsmenn útvirkjanna og býlanna þar sem ofbeldið á upptök sín,“ bættu frjálsu félagasamtökin við og skoruðu á ríkisstjórnina að stöðva fjárveitingarnar og á herinn og lögregluna að stöðva ofbeldisverkin.
